மதுராந்தகம், தாராபுரம் ஆகிய இரு தொகுதிகளுக்கும் விரைவில் இடைத்தேர்தல் நடைபெற உள்ளது. இந்த  நிலையில் அதிமுக கூட்டணியில் இருந்து வெளியேறிய பாமக, திமுகவிற்கு ஆதரவளிக்கும் என்று எதிர்பார்க்கப்படுகிறது.

தமிழகத்தில் இடைத்தேர்தல்

தமிழகத்தில் ஏழு தொகுதிகள் காலியாக இருக்கும் நிலையில் மதுராந்தகம் மற்றும் தாராபுரம் ஆகிய இரு தொகுதிகளுக்கு மட்டுமே இடைத்தேர்தல் அறிவிக்கப்பட்டுள்ளது. திமுக, அதிமுக, தவெக, நாம் தமிழர் மற்றும் கம்யூனிஸ்டுகள் என ஐந்து முனை போட்டி நிலவி வரும் நிலையில் யார் வெற்றி பெறப் போகிறார்கள் என்கிற எதிர்பார்ப்பு நிலவி வருகிறது. திமுக கூட்டணியிலிருந்து பல கட்சிகள் தவெக பக்கம் சென்றுள்ளதால் வெற்றிக்கனியை தவெக பறிக்குமா என்கிற ஆவல் எழுந்துள்ளது. 

அதிமுகவுக்கு ஆதரவளிக்க மறுத்த அன்புமணி

தற்போது திமுக அணியில் சொல்லிக் கொள்ளும் அளவிற்கு பெரிய கட்சிகள் எதுவுமே இல்லை. தேமுதிக, மக்கள் நீதி மையம், மனிதநேய மக்கள் கட்சி, மனிதநேய ஜனநாயக கட்சி, கொங்குநாடு மக்கள் தேசிய கட்சி போன்ற சில கட்சிகள் மட்டுமே இடம்பெற்றுள்ளன. இந்த நிலையில் தேசிய ஜனநாயக கூட்டணியில் அங்கம் வகித்து வந்த பாமக யாருக்கும் ஆதரவு இல்லை என அறிவித்துள்ளது. பாமகவின் இந்த முடிவு அவர்கள் தேசிய ஜனநாயக கூட்டணியில் இருந்து முற்றிலும் வெளியேறி விட்டதை உணர்த்துகிறது.

அதிமுக – பாமக மோதல்

இடைத்தேர்தலில் புரட்சி பாரதம் கட்சியை சேர்ந்த பூவை ஜெகன் மூர்த்தியை மதுராந்தகத்தில் பொது வேட்பாளராக நிறுத்தலாம் என்று அன்புமணி யோசனை கூறியதாகவும், இதை எடப்பாடி பழனிச்சாமி நிராகரித்துவிட்டதாகவும் கூறப்படுகிறது. மேலும் அதிமுகவின் இரண்டாம் கட்டத் தலைவர்கள், பிற கட்சித் தலைவர்களை சந்தித்து ஆதரவு கோரியதும், அன்புமணியை சந்திக்காமல் இருந்ததும் இந்த மோதலுக்கு காரணம் என்று கூறப்படுகிறது. தற்போது அன்புமணியை அதிமுக நிர்வாகிகள் சந்தித்து ஆதரவு கேட்க நேரம் கேட்டும், அவர் நேரம் ஒதுக்க மறுத்ததன் மூலம் அதிமுக பாமக கூட்டணியில் விரிசல் விழுந்தது தெளிவாகத் தெரிகிறது.

திமுகவை நோக்கி நகரும் பாமக

பாமகவின் அடுத்த கட்ட நகர்வானது தவெக அல்லது திமுக பக்கம் இருக்கலாம் என எதிர்பார்க்கப்படுகிறது. ஏற்கனவே விசிக இருக்கும் கூட்டணியில் பாமக இடம் பெற வாய்ப்பு குறைவாகவே உள்ளது. பாமக இருக்கும் இடத்தில் நாங்கள் இருக்க மாட்டோம் என்கிற நிலையில் விசிக உறுதியாக உள்ளது. விஜயால் விசிக மற்றும் பாமக இரு கட்சிகளையும் ஒரே கூட்டணியில் தக்க வைக்க முடியுமா என்பது மில்லியன் டாலர் கேள்வி. விசிக தவெக கூட்டணியில் உறுதியாக இருக்கும் பட்சத்தில் பாமக திமுகவை நோக்கி நகரவே வாய்ப்புகள் அதிகம். 

அன்புமணியிடம் பேசிய மு.க.ஸ்டாலின்

திமுகவுக்கும் பாமகவுக்கும் எந்த பிரச்சினையும் இருந்ததில்லை. கடந்த முறை திமுக கூட்டணியில் விசிக இருந்ததாலேயே பாமகவால் திமுக அணியில் இடம் பெறவில்லை. இந்த நிலையில் இடைத்தேர்தலில் அன்புமணியை தொலைபேசியில் தொடர்பு கொண்டு ஸ்டாலின் ஆதரவு கோரி உள்ளதாக தகவல் கசிந்துள்ளது. தவெக விசிக கூட்டணியை வீழ்த்த வேண்டும் என நினைக்கும் பாமக வாக்காளர்கள் பலவீனமாக இருக்கும் அதிமுகவை விட, பலமாக இருக்கும் திமுகவையே தேர்வாக கருதுவார்கள் என திமுக நினைக்கிறது. பாமக வாக்காளர்கள் கம்யூனிஸ்ட் மற்றும் நாம் தமிழர் போன்ற கட்சிகளை விட வெற்றி திமுகவை தேர்ந்தெடுக்கவே வாய்ப்பு அதிகம் இருப்பதாக திமுக தலைமை கணக்கு போட்டு காய்களை நகர்த்தி வருகிறது.

மக்களவைத் தேர்தலை கருத்தில் கொண்ட பாமக

கடந்த சில ஆண்டுகளாக அதிமுக – பாஜக கூட்டணியில் போட்டியிட்ட பாமக, சந்தித்த அனைத்து தேர்தல்களிலும் பெரிய அளவில் வெற்றியைப் பெறவில்லை. வரவிருக்கும் மக்களவைத் தேர்தலை கருத்தில் கொண்டு பாமக மாற்று வழிகளை ஆராய்கிறது. திமுக தரப்பிலும் வலுவான கூட்டணியை கட்டமைக்க வேண்டிய சூழல் இருப்பதால், பாமகவை எப்படியாவது தங்கள் பக்கம் இழுத்துவிட வேண்டும் என முயற்சிகளை மேற்கொள்கிறது. ஒருவேளை திமுக பாமக கூட்டணி அமையும் பட்சத்தில், இடைத்தேர்தலில் தவெக மற்றும் அதிமுகவிற்கு சவாலான சூழல் ஏற்படும் என்பதில் எந்த மாற்றமும் இல்லை.