குளிர்ந்த காற்று, அதிக நேரம் நிற்பது, போதிய பராமரிப்பின்மை மற்றும் வறட்சி காரணமாக கால் பாதங்களில் வெடிப்பு, சொரசொரப்பு மற்றும் தோல் உரிதல் போன்ற பிரச்சனைகள் ஏற்படுகின்றன. பாதங்களை தினமும் சுத்தமாக வைத்திருப்பதுடன், வாரத்திற்கு 2 முதல் 3 முறை இயற்கையான ஹோம்மேட் ஃபுட் மாஸ்க்குகளைப் (Foot Masks) பயன்படுத்துவது பாதங்களை மென்மையாகவும், பஞ்சு போலும் மாற்ற உதவும்.

தயிர் – தேன் மாஸ்க் (ஈரப்பதம் பெற)

தயிரில் உள்ள லாக்டிக் அமிலம் (Lactic acid) வறண்ட மற்றும் இறந்த செல்களை நீக்க உதவும். தேன் சருமத்திற்குத் தேவையான ஈரப்பதத்தைத் தக்கவைக்கும்.

தயாரிக்கும் முறை: 2 டீஸ்பூன் தயிருடன் 1 டீஸ்பூன் தேன் கலந்து பாதங்களில் நன்றாக தடவவும். 20 நிமிடங்கள் கழித்து வெதுவெதுப்பான நீரில் கழுவ வேண்டும்.

கற்றாழை – தேங்காய் எண்ணெய் (வெடிப்புகளைக் குணப்படுத்த)

கற்றாழை சருமத்திற்கு நல்ல குளிர்ச்சியையும், காயங்களை ஆற்றும் தன்மையையும் தரும். தேங்காய் எண்ணெய் ஆழமான ஈரப்பதத்தை அளிக்கும்.

தயாரிக்கும் முறை: 1 டேபிள்ஸ்பூன் கற்றாழை ஜெல்லுடன் 1 டீஸ்பூன் தேங்காய் எண்ணெய் கலந்து பாதங்களில் தேய்க்கவும். இதை இரவு தூங்குவதற்கு முன் தடவி, பருத்தி (Cotton) காலுறைகளை அணிந்து கொண்டு தூங்கினால் காலையில் பாதங்கள் மிகவும் மென்மையாகும்.

வாழைப்பழம் மாஸ்க் (இயற்கை கண்டிஷனர்)

வாழைப்பழத்தில் உள்ள வைட்டமின்கள் ஏ, பி6 மற்றும் சி சருமத்தின் நெகிழ்வுத்தன்மையை அதிகரித்து வெடிப்புகளை மறையச் செய்யும்.

தயாரிக்கும் முறை: நன்றாக பழுத்த அரை வாழைப்பழத்தை விழுதாக மசித்து, பாதங்களில் தடிமனாகப் பூசவும். 15 முதல் 20 நிமிடங்கள் கழித்து வெதுவெதுப்பான நீரில் அலசவும்.

ஓட்ஸ் – தேன் மாஸ்க் (இறந்த செல்களை நீக்க)

ஓட்ஸ் ஒரு சிறந்த இயற்கையான ஸ்க்ரப்பாகச் (Scrub) செயல்பட்டு, பாதங்களில் உள்ள தடித்த தோலையும் அழுக்குகளையும் அகற்றும்.

தயாரிக்கும் முறை: ஓட்ஸ் பொடி, தேன் மற்றும் சிறிதளவு தயிர் கலந்து கெட்டியான பேஸ்ட் போலச் செய்து பாதங்களில் தடவவும். 15 நிமிடங்கள் கழித்து லேசாகத் தேய்த்துக் கழுவ வேண்டும்.

ஷியா பட்டர் – தேங்காய் எண்ணெய் (அதிக வறட்சிக்கு)

மிகக் கடுமையான வெடிப்பு மற்றும் சொரசொரப்பு உள்ள பாதங்களுக்கு ஷியா பட்டர் (Shea Butter) சிறந்த நிவாரணம் தரும்.

தயாரிக்கும் முறை: ஷியா பட்டர் மற்றும் தேங்காய் எண்ணெயை சம அளவில் கலந்து, இரவு முழுவதும் பாதங்களில் பூசி வரலாம்.

பாதங்களை ஊறவைத்தல்

எந்தவொரு மாஸ்க்கைப் பயன்படுத்துவதற்கு முன்பும், ஒரு அகலமான பாத்திரத்தில் வெதுவெதுப்பான நீர் எடுத்து, அதில் சிறிதளவு கல் உப்பு அல்லது எப்சம் உப்பு (Epsom Salt) மற்றும் லெமன் சாறு சேர்த்து 10-15 நிமிடங்கள் பாதங்களை ஊற வைக்கவும். இது பாதத்தின் கடினமான தோலை மென்மையாக்கி, மாஸ்க் நன்றாக வேலை செய்ய உதவும்.

பியூமிஸ் கல் (Pumice Stone)

பாதங்களை ஊறவைத்த பிறகு பியூமிஸ் கல் அல்லது மென்மையான பிரஷ் கொண்டு குதிங்கால் பகுதியில் உள்ள இறந்த செல்களை லேசாகத் தேய்த்து அப்புறப்படுத்தலாம்.
மாஸ்க் போட்டுக் கழுவிய பிறகு, விரல்களுக்கு இடைப்பட்ட பகுதியைத் துணியால் நன்றாகத் துடைத்து உலர்த்த வேண்டும். ஈரப்பதம் தங்குவது பூஞ்சை தொற்றுக்கு வழிவகுக்கும்.

ஏதேனும் புதுப் பொருளைப் பயன்படுத்தும் போது தோலில் எரிச்சல், சிவத்தல் அல்லது ஒவ்வாமை ஏற்பட்டால் உடனடியாகக் கழுவிவிட்டுப் பயன்படுத்துவதை நிறுத்த வேண்டும்.
பாதங்களில் ஆழமான வெடிப்புகள், ரத்தக் கசிவு, வலி அல்லது நீரிழிவு நோய் (Diabetes) உள்ளவர்கள் சுயமாக சிகிச்சை செய்யாமல் மருத்துவரை அணுகுவது அவசியமாகும்.