ஜப்பானில் நடைபெற்று வரும் ஆசிய விளையாட்டுப் போட்டிகள் இறுதிக்கட்டத்தை எட்டியுள்ள நிலையில், இந்தியாவின் தங்கம் வெல்லும் எண்ணிக்கை குறைந்து வருவது சங்கடத்தை ஏற்படுத்தி உள்ளது. மூன்று ஆண்டுகளுக்கு முன்பு ஹாங்சோவில் நடைபெற்ற போட்டியில் இந்தியா 28 தங்கம் பதக்கம் வென்றிருந்தது. இதில் 20 பதக்கங்கள், அய்ச்சி-நாகோயாவில் துப்பாக்கிச் சுடுதல், தடகளம், வில்வித்தை, பேட்மிண்டன், குதிரையேற்றம், ஸ்குவாஷ் மற்றும் டென்னிஸ் ஆகிய விளையாட்டுகளில் கிடைத்தது.

அதே சமயம் 2026 ஆசிய விளையாட்டு போட்டிகளில் இந்த பதக்கங்கள் கைநழுவிப்போயின. ஹாங்சோவில் துப்பாக்கிச் சுடுதல், தடகளம் மற்றும் வில்வித்தை ஆகியவற்றில் இந்தியா ஒன்பது தனிநபர் தங்கப் பதக்கங்களை வென்றது. தற்போதைய தொடரில் அவற்றுள் ஒன்றைக் கூட இந்தியா கைப்பற்றவில்லை. மேலும் சில போட்டிகளில் இந்தியாவால் இறுதிச் சுற்றுக்குக் கூட முன்னேற முடியவில்லை.

2023-ல், இந்தியா 28 தங்கம், 38 வெள்ளி மற்றும் 40 வெண்கலம் என வரலாற்றுச் சிறப்புமிக்க 106 பதக்கங்களைக் குவித்தது. துப்பாக்கிச் சுடுதல் போட்டியில் மட்டும் ஏழு தங்கங்களும், தடகளத்தில் ஆறு தங்கங்களும் கிடைத்தன; வில்வித்தையில் அனைத்து காம்பவுண்ட் தங்கப் பதக்கங்களையும் இந்தியா கைப்பற்றியது. ஆனால் தற்போது இந்தியா துப்பாக்கிச் சுடுதலில் வென்ற ஏழு, தடகளத்தில் வென்ற ஆறு தங்கப் பதக்கங்களையும் இழந்துள்ளது. வில்வித்தையில் மூன்று அணிப் பிரிவுகளின் பட்டங்கள் தப்பியிருந்தாலும், தனிநபர் பிரிவுகள் இரண்டிலும் தங்கம் கிடைக்கவில்லை.

ஸ்குவாஷ் போட்டியில், 2023-ல் ஆண்கள் அணிப் பிரிவு மற்றும் கலப்பு இரட்டையர் பிரிவில் வென்ற இரு பட்டங்களையும் இந்தியா இழந்துவிட்டது. பேட்மிண்டன் ஆண்கள் இரட்டையர், டிரெஸாஜ் அணிப் பிரிவு மற்றும் டென்னிஸ் கலப்பு இரட்டையர் ஆகியவற்றிலும் தங்கப் பதக்கங்களும் தக்கவைக்கப்படவில்லை. அக்டோபர் 1 வரை ஆசிய விளையாட்டு போட்டியில் இந்தியா 10 தங்கப் பதக்கங்களை வென்றுள்ளது.

ஆண்கள் ஹாக்கி மற்றும் கிரிக்கெட் அணிகள் இன்னும் தங்கள் பட்டங்களைத் தற்காத்துக் கொள்ளும் வாய்ப்பைக் கொண்டுள்ளன. இந்த இரு விளையாட்டுகளிலும் இறுதிப்போட்டி அக்டோபர் 3-ந்தேதி நடைபெற உள்ளது. இந்த ஆசிய விளையாட்டு போட்டியில் இந்தியாவின் ஒட்டுமொத்த பதக்க எண்ணிக்கை 60-க் கடந்து, நாடு ஒட்டுமொத்தப் பட்டியலில் 8-வது இடத்தில் உள்ளது; ஆனால் சீனா இதுவரை 154 தங்கப் பதக்கங்களையும், ஒட்டுமொத்தமாக 288 பதக்கங்களையும் வென்று பதக்க பட்டியலில் முதலிடத்தில் உள்ளது.

தற்போதைய ஆசிய விளையாட்டு போட்டிகளில் இதுவரை இந்தியா வென்ற 10 தங்கப் பதக்கங்களில் ஒன்று மட்டுமே தனிநபர் பிரிவில் கிடைத்துள்ளது: அது நீரு தண்டாவின் வரலாற்றுச் சிறப்புமிக்க பெண்கள் டிராப் வெற்றி. மீதமுள்ளவை அணிகள், ரிலே அல்லது கலப்புப் போட்டிகள் மூலம் கிடைத்துள்ளன. இந்தியாவின் வாய்ப்பு இன்னும் முடியவிலை. இந்தியா ஹாக்கி அணி அரையிறுதியில் பாகிஸ்தானை 4-3 என்ற கணக்கில் குறுகிய வித்தியாசத்தில் வீழ்த்தி தங்கப் பதக்கப் போட்டிக்கு முன்னேறியுள்ளது.

அதேபோல் கிரிக்கெட் போட்டியின் அரையிறுதியில் இலங்கை அணியை 124 ரன்கள் வித்தியாசத்தில் வீழ்த்திய இந்திய அணியும் இறுதிப் போட்டிக்கு முன்னேறி பாகிஸ்தானை எதிர்கொள்கிறது. இவ்விரண்டிலும் இந்தியா வெற்றி பெற்றாலும் கூட, ஹாங்சோவில் வென்ற 28 தங்கங்களில் 20 தங்கப் பதக்கங்கள் இன்னமும் இழக்கப்பட்டதாகவே இருக்கும்.