பெருநகரங்களுக்கு வேலை மற்றும் உயர்கல்விக்காக இடம்பெயரும் லட்சக்கணக்கான திருமணமாகாத இளைஞர்கள் சந்திக்கும் மிகப்பெரிய சவால், வாடகை வீடு தேடுவது தான். தரகர் கட்டணம் செலுத்தி, வீட்டின் உரிமையாளருடன் வாடகை ஒப்பந்தம் வரை முடிந்த பிறகும், குடியிருப்பு நலச் சங்கங்களின் (RWA – Residents Welfare Association) தலைவரோ அல்லது செயலாளரோ “எங்கள் அபார்ட்மெண்ட்டில் திருமணமாகாதவர்களுக்கு அனுமதி இல்லை, குடும்பங்களுக்கு மட்டுமே வீடு தருவோம்” என்று கூறி தடுப்பது அன்றாட நிகழ்வாகிவிட்டது.

ஆனால், ஒரு நபரின் திருமண நிலையை வைத்து குடியிருப்புச் சங்கங்கள் வாழும் உரிமையை மறுக்க முடியுமா? இதற்கான சட்டப்பூர்வ தீர்வுகள் என்னென்ன என்பதை விரிவாகப் பார்ப்போம்.

அரசியலமைப்புச் சட்டம் மற்றும் நீதிமன்றத் தீர்ப்புகள் கூறுவது என்ன?

பாகுபாட்டிற்கு எதிரான உரிமை (சரத்து 15): இந்திய அரசியலமைப்புச் சட்டத்தின் 15-வது பிரிவின்படி, மதம், சாதி, பாலினம் அல்லது திருமண நிலை ஆகியவற்றின் அடிப்படையில் எந்தவொரு குடிமகனுக்கும் எதிராக பாகுபாடு காட்டுவது சட்டப்படி குற்றமாகும்.

சொத்து உரிமையாளரின் தனிப்பட்ட அதிகாரம்: உச்ச நீதிமன்றம் மற்றும் பல்வேறு உயர் நீதிமன்றத் தீர்ப்புகளின்படி, ஒரு சொத்தின் உரிமையாளர் தனது வீட்டை சட்டவிரோத செயல்களில் ஈடுபடாத எந்தவொரு குடிமகனுக்கும் வாடகைக்கு விட முழு உரிமை படைத்தவர்.

துணை விதிகள் (By-laws) செல்லாது: அபார்ட்மெண்ட் சங்கங்கள் தங்கள் ஆண்டு பொதுக் கூட்டங்களில் “பேச்சிலர்களுக்கு வீடு தரக்கூடாது” என்று தீர்மானம் நிறைவேற்றினாலும், நாட்டின் அரசியலமைப்புச் சட்டத்திற்கு எதிரான எந்தவொரு துணை விதியும் சட்டப்படி செல்லுபடியாகாது.

தடையில்லாச் சான்றிதழ் உண்மையிலேயே கட்டாயமா?

கூட்டுறவுச் சங்கங்களின் புதிய விதிகளின்படி, ஒரு உரிமையாளர் தனது வீட்டை வாடகைக்கு விட சங்கத்திடமிருந்து தடையில்லா சான்றிதழ் பெற வேண்டிய அவசியம் இல்லை.

சட்டப்பூர்வ நடைமுறை

உரிமையாளரும் வாடகைதாரரும் பதிவு செய்யப்பட்ட வாடகை ஒப்பந்தம் செய்து, உள்ளூர் காவல் நிலையத்தில் காவல்துறை சரிபார்ப்பை (Police Verification) முடித்து, அதன் நகலைச் சங்க அலுவலகத்தில் தகவலுக்காக சமர்ப்பித்தால் மட்டும் போதுமானது.

சங்கங்கள் கெடுபிடி செய்தால் பேச்சிலர்கள் செய்ய வேண்டியவை

எழுத்துப்பூர்வ ஆதாரம் கேளுங்கள்: “திருமணமாகாதவர்களுக்கு அனுமதி இல்லை என்ற விதியை உங்களது அதிகாரப்பூர்வ லெட்டர் பேடில் எழுத்துப்பூர்வமாகக் கொடுங்கள்” என்று கேளுங்கள். சட்டவிரோதமானது என்பதால் எந்த சங்கமும் அதை எழுதித்தரத் துணியாது.

துணைப் பதிவாளரிடம் புகார் (Registrar of Co-operative Societies)

சங்கத்தின் அத்துமீறல் தொடர்ந்தால், வீட்டின் உரிமையாளர் அல்லது வாடகைதாரர் கூட்டுறவுச் சங்கங்களின் பதிவாளரிடம் உடனடியாக எழுத்துப்பூர்வமாகப் புகார் அளிக்கலாம்.

காவல்துறை & நுகர்வோர் மன்றம்

கேட்டைப் பூட்டுவது, பொருட்களைத் தூக்கி எறிவது அல்லது மனரீதியாகத் துன்புறுத்துவது போன்ற செயல்களில் ஈடுபட்டால், நுகர்வோர் நீதிமன்றத்திலோ அல்லது உள்ளூர் காவல் நிலையத்திலோ நேரடியாகப் புகார் அளிக்கலாம்.

சங்கங்களுக்கான அதிகார வரம்பு என்ன?

கட்டுப்பாடுகள் விதிக்கலாம், தடை விதிக்க முடியாது: இரவில் உரத்த இசை வைப்பதைத் தடுப்பது, பொது இடங்களில் மது அருந்துவதைத் தடுப்பது அல்லது வாகன நிறுத்துமிட விதிகளை முறைப்படுத்துவது போன்ற பொதுவான அமைதிக்கான விதிகளை உருவாக்க சங்கங்களுக்கு உரிமை உண்டு.

விதிகளை மீறினால் நடவடிக்கை: வாடகைதாரர் எவரேனும் பொது அமைதிக்கு குந்தகம் விளைவித்தால், சங்கம் நேரடியாக காவல்துறையை அணுகலாமே தவிர, ‘திருமணச் சான்றிதழ் இல்லை’ என்பதற்காக ஒட்டுமொத்த இளைஞர் சமூகத்தையும் வீட்டை விட்டு வெளியேற்ற சட்டத்தில் இடமில்லை.