தமிழக முதல்வர் ‘தளபதி’ விஜய்யின் மகன் ஜேசன் சஞ்சய் (Jason Sanjay) ‘சிக்மா’ (Sigma) என்ற திரைப்படத்தின் மூலம் இயக்குனராக அறிமுகமாகவுள்ளார். அக்டோபர் 2-ஆம் தேதி இந்த படம் வெளியாகவுள்ள நிலையில் படக்குழு தீவிர ப்ரமோஷன் பணிகளில் ஈடுபட்டு வருகின்றது.

இந்த ப்ரமோஷன் பணிகளின் போது ஜேசன் சஞ்சய் சுவாரஸ்யமான ஒரு விஷயத்தைப் பகிர்ந்துகொண்டார். திரைப்படத்தின் விரிவான கதையை தனது குடும்பத்தினரிடம் கூட தான் பகிர்ந்து கொள்ளவில்லை என்று அவர் கூறினார். அவர்கள் ஒரு சாதாரணப் பார்வையாளரைப் போலத் திரைப்படத்தை ரசிக்க வேண்டும் என்பதே தனது விருப்பம் என்றும் ஜேசன் தெளிவுபடுத்தினார்.

‘கலாட்டா பிளஸ்’ ஊடகத்திற்கு அளித்த நேர்காணலில் பேசிய ஜேசன் மக்கள் தன்னை எப்படி மதிப்பிடுகிறார்கள், ஒரு தனிநபராகப் பார்க்கிறார்களா அல்லது நடிகர் விஜய்யின் மகனாகப் பார்க்கிறார்களா என்பது குறித்து அச்சம் உள்ளதா என்ற கேள்விக்கு, அதைப் பற்றித் தான் எப்போதும் யோசிப்பதுண்டு என்று ஜேசன் பதிலளித்தார். “நான் அதைப் பற்றி எப்போதும் யோசிப்பதுண்டு. அதை மறுக்க முடியாது,” என்று அவர் கூறினார்.

குடும்பப் பாரம்பரியத்தின் காரணமாகத் தான் எதிர்கொள்ள வேண்டிய கூடுதல் கவனத்தைப் பற்றித் தெரிந்திருந்தாலும், தனது திரைப்படங்களே தனது அடையாளத்தைத் தீர்மானிக்கும் என்று ஜேசன் நம்புகிறார். “படம் தொடங்கி ஐந்து நிமிடங்களுக்குள் மக்கள் அதை ஒரு திரைப்படமாக மட்டுமே பார்க்கத் தொடங்குவார்கள் என்று நினைக்கிறேன். எனக்குக் கிடைக்கும் விமர்சனங்கள் நேர்மறையானதாக இருந்தாலும் சரி, எதிர்மறையானதாக இருந்தாலும் சரி, எனது படைப்புகளே நான் யார் என்பதை நிரூபிக்கும்,” என்று கூறினார்.

சிக்மா’ திரைப்படத்தின் வெளியீட்டிற்குப் பிறகு தனது சொந்த அடையாளத்தை உருவாக்குவதில் கூடுதல் கவனம் செலுத்த முடியும் என எதிர்பார்ப்பதாகவும் அவர் தெளிவுபடுத்தினார். சிக்மாவின் வெற்றியின் மூலமும் அதன் மூலம் கிடைக்கும் கவனத்தின் மூலமும் எனது திரைப்பயணத்தின் அடுத்த கட்டத்தைக் கட்டமைக்கவே நான் விரும்புகிறேன் என்று கூறியுள்ளார்.

சிக்மா திரைப்படத்தில் துரோகம் இழைக்கப்பட்ட பிறகு பழிவாங்கும் உறுதியுடன் முன்னேறும் கதாபாத்திரமாகவே சந்தீப் கிஷனின் கதாபாத்திரம் ட்ரெய்லரில் சித்தரிக்கப்பட்டுள்ளது. போதைப்பொருள் மற்றும் சூதாட்டம் தொடர்பான 500 கோடி ரூபாய் மதிப்புள்ள ஒரு மிகப்பெரிய ராக்கெட் தான் இத்திரைப்படத்தின் கதையின் மையப்புள்ளி. துரோகமும் பணமும் குற்றங்களும் நிறைந்த ஆபத்தான உலகிற்குள் கதாநாயகன் நுழைய வேண்டியிருப்பதே இத்திரைப்படத்தின் கதையாக இருக்கும் என்று யூகிக்கப்படுகிறது.

‘இதனிடையே, பாக்ஸ் ஆபீஸில் விஜய்யின் ‘திருப்பாச்சி’ திரைப்படத்தின் ரீ-ரிலீஸுடன் ‘சிக்மா’ மோதவுள்ளது. ‘விஜய் நடிப்பில் கடந்த 2005-ம் ஆண்டு வெளியான ‘திருப்பாச்சி’ 2026 அக்டோபர் 1-ஆம் தேதி மீண்டும் வெளியாகிறது. ஜேசன் சஞ்சய் இயக்கும் ‘சிக்மா’ அக்டோபர் 2-ஆம் தேதி திரையரங்குகளுக்கு வரவுள்ளது. இதன் மூலம் தந்தை விஜய்யின் திரைப்படமும் மகன் ஜேசன் சஞ்சய்யின் திரைப்படமும் ஒரே நேரத்தில் பாக்ஸ் ஆபீஸில் திரையிடப்படுகின்றன என்ற சிறப்பம்சமும் உருவாகியுள்ளது.