புதுச்சேரி யூனியன் பிரதேசத்தில் எதிர்வரும் வடகிழக்குப் பருவமழையை (Northeast Monsoon – NEM) எதிர்கொள்வதற்காக மேற்கொள்ளப்பட்டு வரும் முன்னெச்சரிக்கை மற்றும் தயார்நிலை நடவடிக்கைகள் குறித்து, தலைமைச் செயலரும் மாநில செயற்குழுவின் (State Executive Committee – SEC) தலைவருமான தலைமையில் ஆய்வுக் கூட்டம் நடைபெற்றது.

வடகிழக்குப் பருவமழையின்போது ஏற்படக்கூடிய கனமழை, வெள்ளப்பெருக்கு, புயல், கடல் சீற்றம் மற்றும் இதர அவசரநிலைச் சம்பவங்களை எதிர்கொள்வதற்காக பல்வேறு துறைகளால் மேற்கொள்ளப்பட்டு வரும் முன்னெச்சரிக்கை மற்றும் தயார்நிலை நடவடிக்கைகளை தலைமைச் செயலர் அவர்கள் ஆய்வு செய்தார்.

கூட்டத்தில், சிறப்புச் செயலர் (வருவாய்)-cum-மாவட்ட ஆட்சியர் அவர்கள், புதுச்சேரி யூனியன் பிரதேசம் முழுவதும் வடகிழக்குப் பருவமழையை எதிர்கொள்வதற்காக மேற்கொள்ளப்பட்டு வரும் தயார்நிலை நடவடிக்கைகள் குறித்து விரிவாக விளக்கினார்.
மழைநீர் வடிகால்கள் மற்றும் கால்வாய்கள், தாழ்வான மற்றும் வெள்ள அபாயப் பகுதிகள், நீர்நிலைகள், புயல் மற்றும் கனமழை முன்னெச்சரிக்கை நடவடிக்கைகள், அவசரகால மீட்பு மற்றும் நிவாரண ஏற்பாடுகள், தங்குமிடங்கள், அத்தியாவசிய சேவைகள் மற்றும் தகவல் தொடர்பு வசதிகள், மனிதவளம் மற்றும் துறை வாரியான வளங்கள்: மேலும், புதுச்சேரி, காரைக்கால் மற்றும் ஏனாம் பிராந்தியங்களில் மேற்கொள்ளப்பட்டு வரும் முன்னெச்சரிக்கை நடவடிக்கைகள் குறித்தும், பேரிடர் நேரத்தில் துறைகளுக்கிடையேயான ஒருங்கிணைப்பு குறித்தும் விளக்கினார்.

சென்னை மண்டல வானிலை ஆய்வு மையத்தின் (Regional Meteorological Centre – RMC) விஞ்ஞானி ‘G’-cum-தலைவர் டாக்டர் சிவானந்த தாமோதர பாய் அவர்கள் காணொலிக் காட்சி வாயிலாகக் கலந்து கொண்டார். புதுச்சேரி யூனியன் பிரதேசத்தில் எதிர்பார்க்கப்படும் வடகிழக்குப் பருவமழையின் நிலவரம் மற்றும் பருவமழைக் காலத்தில் ஏற்படக்கூடிய வானிலை மாற்றங்கள் குறித்து அவர் விரிவான விளக்கம் அளித்தார். தற்போதைய எல் நினோ (El Nino) நிலைமைகள் மற்றும் அதனால் புதுச்சேரி யூனியன் பிரதேசத்தில் ஏற்படக்கூடிய தாக்கங்கள் குறித்தும் விளக்கினார்.

பேரிடர் மற்றும் அவசரநிலைச் சம்பவங்களின்போது தங்களது பொறுப்புகளை உடனடியாக ஏற்று திறம்படச் செயல்பட்டு வரும் அனைத்துத் துறைகளின் சம்பவ மறுமொழி அமைப்புக் (Incident Response System – IRS) குழுக்களுக்கும், மாநில செயற்குழுவின் தலைவர் என்ற முறையில் தலைமைச் செயலர் அவர்கள் பாராட்டுகளையும் வாழ்த்துகளையும் தெரிவித்தார். வடகிழக்குப் பருவமழைக் காலத்திலும் இதேபோன்ற ஒருங்கிணைந்த அணுகுமுறையுடன் செயல்பட்டு, எந்தவொரு பேரிடர் அல்லது அவசரநிலைச் சம்பவம் ஏற்பட்டாலும் விரைவான மற்றும் திறன்மிக்க நடவடிக்கையை உறுதி செய்யுமாறு அவர் அறிவுறுத்தினார்.

இக்கூட்டத்தில் புதுச்சேரி காவல்துறை தலைமை இயக்குநர் (DGP), புதுச்சேரி அரசின் அனைத்துச் செயலர்கள் மற்றும் பல்வேறு துறைகளின் தலைவர்கள் நேரில் கலந்து கொண்டனர். காரைக்கால் மற்றும் ஏனாம் பிராந்திய நிர்வாகிகள் காணொலிக் காட்சி வாயிலாகப் பங்கேற்றனர்.