தினமும் அலுவலகம், தொழில் மற்றும் தனிப்பட்ட தேவைகளுக்காக வாகனங்களைப் பயன்படுத்தும் இந்திய மக்களுக்கு பெட்ரோல், டீசல் விலை என்பது குடும்ப பட்ஜெட்டில் மிக முக்கிய பங்கு வகிக்கிறது. இத்தகைய சூழலில், உலகின் மிக முக்கியமான கடல்வழி எண்ணெய் பாதையான ஹார்முஸ் ஜலசந்தியை மீண்டும் திறக்க ஈரான் சம்மதம் தெரிவித்துள்ளதாகவும், இதனால் இந்தியாவில் பெட்ரோல், டீசல் விலை லிட்டருக்கு ரூ.15 வரை குறைய வாய்ப்புள்ளதாகவும் தகவல்கள் பரவி வருகின்றன.

ஹார்முஸ் ஜலசந்தி விவகாரம் – ஈரான் முன்வைத்த கோரிக்கை

ஈரான் மற்றும் அமெரிக்கா இடையே நீடித்து வரும் ராணுவ மோதல்களுக்கு மத்தியில், சர்வதேச வர்த்தகத்திற்கு மிகவும் முக்கியமான ஹார்முஸ் ஜலசந்தியை திறப்பது தொடர்பாகப் பேச்சுவார்த்தை நடைபெற்று வருவதாக தகவல்கள் தெரிவிக்கின்றன.

அமெரிக்கா தனது ராணுவ அழுத்தத்தைக் குறைத்து, ஈரானிய துறைமுகங்கள் மீதான கடற்படை முற்றுகையை நீக்கினால், 7 நாட்களுக்குள் ஹார்முஸ் வழித்தடத்தை மீண்டும் திறக்க தயாராக இருப்பதாக ஈரானின் மூத்த அதிகாரி ஒருவர் தெரிவித்ததாகக் கூறப்படுகிறது.

முரண்பட்ட தகவல்கள்

இருப்பினும், 7 நாட்களில் வழித்தடம் திறக்கப்படும் என்ற செய்தியை ஈரானின் ‘ஃபார்ஸ்’ (Fars) செய்தி நிறுவனம் மறுத்துள்ளதாகவும் தகவல்கள் வெளியாகி உள்ளதால், இதில் இன்னும் அதிகாரப்பூர்வமான இறுதி முடிவு எட்டப்படவில்லை என்பது தெளிவாகிறது.

ஏன் இவ்வளவு முக்கியத்துவம்?

மத்திய கிழக்கில் உள்ள பாரசீக வளைகுடாவையும் ஓமன் வளைகுடாவையும் இணைக்கும் குறுகிய கடல்வழிப் பாதையே ஹார்முஸ் ஜலசந்தி. சவுதி அரேபியா, ஈராக், குவைத், ஐக்கிய அரபு அமீரகம் போன்ற முன்னணி எண்ணெய் உற்பத்தி நாடுகள் இப்பாைதை வழியே தான் உலகின் பிற பகுதிகளுக்கு கச்சா எண்ணெயை ஏற்றுமதி செய்கின்றன.

உலகளாவிய கச்சா எண்ணெய் மற்றும் திரவமாக்கப்பட்ட இயற்கை எரிவாயு (LNG) விநியோகத்தில் சுமார் 20 சதவீதம் இந்த ஒரு வழித்தடத்தையே சார்ந்துள்ளது. இப்பாதையில் தடைகள் ஏற்படும்போது கப்பல் காப்பீடு, சரக்கு போக்குவரத்துச் செலவுகள் அதிகரித்து சர்வதேச அளவில் கச்சா எண்ணெய் விலை கடுமையாக உயர்கிறது.

சர்வதேச சந்தையில் கச்சா எண்ணெய் விலை சரிவு

ஹார்முஸ் வழித்தடம் திறக்கப்படலாம் என்ற தகவல் வெளியானதைத் தொடர்ந்து, சர்வதேசச் சந்தையில் கச்சா எண்ணெய் விநியோகம் சீராகும் என்ற எதிர்பார்ப்பில் பிரெண்ட் (Brent) கச்சா எண்ணெய் விலை ஒரு பேரலுக்கு 100 அமெரிக்க டாலருக்கு கீழே சரிந்தது.

மேலும், சவுதி அரேபியா தனது ‘ஈஸ்ட்-வெஸ்ட்’ (East-West) எண்ணெய் குழாய் வழித்தடத்தின் மூலம் செங்கடலில் உள்ள யன்பு துறைமுகத்திற்கு எண்ணெயைக் கொண்டு செல்லும் மாற்று பாதைகளையும் பயன்படுத்தி விநியோகத்தை சீராக வைக்க முயற்சித்து வருகிறது.

இந்தியாவில் பெட்ரோல், டீசல் விலை ரூ.15 குறையுமா?

சர்வதேச அளவில் கச்சா எண்ணெய் விலை குறைந்தால், இந்தியாவில் எரிபொருள் விலை குறைய வாய்ப்புகள் உண்டு என்பது உண்மைதான். ஆனால், சந்தையில் பரவும் லிட்டருக்கு ரூ.15 குறையும் என்ற செய்தி அதிகாரப்பூர்வமான அறிவிப்பு அல்ல.

இந்தியாவில் பெட்ரோல், டீசல் விலையைத் தீர்மானிப்பதில் பல காரணிகள் உள்ளன

கச்சா எண்ணெய் கொள்முதல் செலவு (Crude Import Cost)

அமெரிக்க டாலருக்கு எதிரான இந்திய ரூபாயின் மதிப்பு (USD-INR Exchange Rate)

சுத்திகரிப்பு மற்றும் விநியோகச் செலவுகள் (Refining & Logistics Cost)

மத்திய மற்றும் மாநில அரசுகளின் வரிகள் (Excise Duty & VAT)

உள்நாட்டு எண்ணெய் நிறுவனங்களின் விலை நிர்ணயக் கொள்கை

எனவே, சர்வதேச சந்தையில் ஏற்படும் உடனடி விலை மாற்றங்கள் அப்படியே நேரடியாகச் சில்லறை விலையில் பிரதிபலிக்காது. ஹார்முஸ் ஜலசந்தி முழுமையாகத் திறக்கப்பட்டு, கச்சா எண்ணெய் விநியோகம் சீராகி, இந்திய எண்ணெய் நிறுவனங்கள் அதிகாரப்பூர்வமாக அறிவித்தால் மட்டுமே விலை குறைப்பு அமலுக்கு வரும்.