இந்தியாவின் பெருமைமிக்க கண்டுபிடிப்பாளரும் தொழிலதிபருமான ஜி.டி. நாயுடுவின் வாழ்க்கை வரலாற்றை மையமாகக் கொண்டு உருவான 'ஜி.டி.என்.' (GDN) திரைப்படம், நெட்ஃபிலிக்ஸ் ஓடிடி தளத்தில் வெளியாகி உலகளவில் பெரும் வரவேற்பைப் பெற்று வருகிறது. நடிகர் ஆர். மாதவன் முதன்மைப் பாத்திரத்தில் நடித்து தயாரித்துள்ள இத்திரைப்படம், கடந்த செப்டம்பர் 4-ம் தேதி நெட்ஃபிலிக்ஸ் ஓடிடி தளத்தில் தமிழ், தெலுங்கு, இந்தி, கன்னடம் மற்றும் மலையாளம் ஆகிய மொழிகளில் ஸ்ட்ரீமிங்கிற்கு வந்தது.

உலகளாவிய டாப் 10 சாதனை

ஓடிடியில் வெளியான சில நாட்களிலேயே, நெட்ஃபிலிக்ஸின் 'ஆங்கிலம் அல்லாத திரைப்படங்களுக்கான உலகளாவிய டாப் 10' (Global Top 10 Non-English Movies) பட்டியலில் 'ஜி.டி.என்.' திரைப்படம் அதிகாரப்பூர்வமாக இடம் பிடித்து சாதனை படைத்துள்ளது.

ஜி.டி. நாயுடுவின் 25 வயது முதல் 75 வயது வரையிலான காலகட்டத்தைக் கண்முன்னே கொண்டுவந்து மாதவன் பிரமாதமான நடிப்பை வெளிப்படுத்தியுள்ளார். இதில் சத்யராஜ், ஜெயராம், பிரியாமணி, துஷாரா விஜயன் மற்றும் வினய் ராய் உள்ளிட்ட பல முன்னணி நட்சத்திரங்கள் முக்கியக் கதாபாத்திரங்களில் நடித்துள்ளனர். 'ராக்கெட்ரி: தி நம்பி எஃபெக்ட்' திரைப்படத்திற்குப் பிறகு மாதவன் தனது மனைவி சரிதா மாதவனுடன் இணைந்து இத்திரைப்படத்தைத் தயாரித்துள்ளார். இந்திய எல்லைகளைத் தாண்டி உலகளாவிய அளவில் ஓடிடி பார்வையாளர்களிடையே இத்திரைப்படம் தொடர்ந்து நல்ல வரவேற்பைப் பெற்று ட்ரெண்டிங்கில் நீடித்து வருகிறது.