இந்தியாவில் அன்றாட பணப் பரிவர்த்தனைகளுக்கு கூகுள் பே (Google Pay), போன்பே (PhonePe), பேடிஎம் (Paytm) போன்ற யுபிஐ (UPI) செயலிகளைப் பயன்படுத்துவோரின் எண்ணிக்கை கோடிகளைத் தாண்டியுள்ளது. இந்நிலையில், வரும் அக்டோபர் 15, 2026 முதல் யுபிஐ பரிவர்த்தனைகளுக்கான புதிய ‘மெர்ச்சன்ட் டிஸ்கவுண்ட் ரேட்’ விதிமுறைகள் அமலுக்கு வரவுள்ளன.

நிதி அமைச்சகம் இதுகுறித்து எக்ஸ் தளத்தில் அதிகாரப்பூர்வ தகவலை வெளியிட்டுள்ளது. இதன்படி, ரூ.2,000-க்கு மேல் நடக்கும் குறிப்பிட்ட வியாபார பரிவர்த்தனைகளுக்கு மட்டுமே இந்த கட்டண முறை பொருந்தும். சாதாரண வாடிக்கையாளர்களுக்கு யுபிஐ பயன்பாடு எப்போதும் போல முற்றிலும் இலவசமே.

எந்த 10 வகை பேமெண்ட்களுக்கு எம்டிஆர் கட்டணம் பொருந்தும்?

ரூ.2,000 தொகையைக் கடக்கும்போது கீழ்க்கண்ட 10 வகையான பரிவர்த்தனைகளுக்கு இந்த புதிய எம்டிஆர் விதிமுறை பொருந்தும்

ரூ.2,000-க்கு மேல் செய்யப்படும் சாதாரணக் கடைக்காரர் பேமெண்ட்கள்.

ரூ.2,000-க்கு மேல் செய்யப்படும் ரயில்வே டிக்கெட் முன்பதிவு.

ரூ.2,000-க்கு மேல் செய்யப்படும் டெலிகாம் மற்றும் மொபைல் ரீசார்ஜ்.

ரூ.2,000-க்கு மேல் செலுத்தப்படும் இன்சூரன்ஸ் பிரீமியம்.

ரூ.2,000-க்கு மேல் போடும் பெட்ரோல் / டீசல் கட்டணம்.

ரூ.2,000-க்கு மேல் வாங்கப்படும் விவசாயப் பொருட்கள் (விதை / உரம்).

மியூச்சுவல் ஃபண்ட் முதலீடுகள்.

பத்திரங்கள் தொடர்பான பேமெண்ட்கள்.

ஸ்டாக் புரோக்கர்களுக்கான கட்டணங்கள்.

பங்குச்சந்தை டீலர்களுக்கான பரிவர்த்தனைகள்.

சாதாரண வியாபாரிகள்

ரூ. 2,000-க்கு மேற்பட்ட பரிவர்த்தனைகளுக்கு 0.4% கட்டணம். (எவ்வளவு பெரிய தொகையாக இருந்தாலும் அதிகபட்சக் கட்டணம் ரூ. 300 மட்டுமே).

அத்தியாவசியத் துறைகள் (ரயில்வே, பெட்ரோல், இன்சூரன்ஸ், மொபைல் ரீசார்ஜ்)

சதவீத கணக்கு இல்லாமல், பரிவர்த்தனை ஒன்றுக்கு ரூ.5 மட்டும் நிலையான (Flat Fee) கட்டணமாக வசூலிக்கப்படும்.

பங்குச்சந்தை & மியூச்சுவல் ஃபண்ட்

மூலதனச் சந்தை பேமெண்ட்களுக்கு 0.2% கட்டணம் (அதிகபட்சமாக ரூ.300 வரை).

சிறு வியாபாரிகளுக்கு முழு விலக்கு

க்யூ ஆர் கோடு மூலம் மாதத்திற்கு ரூ.1 லட்சம் வரை வருமானம் ஈட்டும் சிறு வியாபாரிகளுக்கு இந்த புதிய விதிமுறையில் இருந்து முழு விலக்கு அளிக்கப்பட்டுள்ளது. அவர்களிடம் எந்தவித பரிவர்த்தனைக் கட்டணமும் வசூலிக்கப்படாது.

வாடிக்கையாளர்களுக்கு பாதிப்பு உண்டா?

நிச்சயமாக இல்லை. இந்த எம்டிஆர் கட்டணம் என்பது வங்கிகள் மற்றும் பரிவர்த்தனை அமைப்புகளுக்கு இடையே வியாபாரிகளால் செலுத்தப்படுவதாகும்.

வாடிக்கையாளர்களிடம் இருந்து கூகுள் பே, போன்பே போன்ற ஆப்களோ அல்லது வங்கிகளோ எந்த மறைமுகக் கட்டணத்தையும் வசூலிக்கக் கூடாது.

இந்த கட்டணத்தை வியாபாரிகள் வாடிக்கையாளர்களின் தலையில் கட்டக் கூடாது என மத்திய அரசு கடுமையாக எச்சரித்துள்ளது.

நபர்களுக்கு இடையேயான (P2P – Friends/Family) பரிவர்த்தனைகள் மற்றும் ரூ.2,000 வரையிலான சிறு வியாபார பேமெண்ட்கள் எப்போதும் போல 0% கட்டணத்தில் தொடரும். இதனால் நாட்டின் 96% யுபிஐ பயன்பாடுகளுக்கு எந்த பாதிப்பும் இருக்காது.