இந்தியாவில் ஜனநாயக முறைப்படி சுதந்திரமாகவும் நேர்மையாகவும் தேர்தல்களை நடத்தும் பொறுப்பு இந்தியத் தேர்தல் ஆணையத்திற்கு (ECI) உள்ளது. தேர்தல் ஆணையர்கள் எவ்வித அரசியல் அழுத்தமுமின்றிச் செயல்படுவதை உறுதிசெய்ய, இந்திய அரசியலமைப்பின் 324(5)வது பிரிவு அவர்களுக்குப் பணிப் பாதுகாப்பையும், பதவியிலிருந்து நீக்குவதற்கான கண்டிப்பான விதிகளையும் வழங்குகிறது.

‘பதவி நீக்கம்’ – அரசியலமைப்பு விளக்கம்

அரசியலமைப்பு ரீதியாக “பதவி நீக்கம்” என்ற சொல், பிரிவு 61-ன் கீழ் இந்தியக் குடியரசுத் தலைவரைப் பதவியிலிருந்து அகற்றுவதற்கு மட்டுமே பயன்படுத்தப்படுகிறது. இருப்பினும், தலைமைத் தேர்தல் ஆணையரை (CEC) பதவியிலிருந்து நீக்கும் நடைமுறை, உச்ச நீதிமன்ற நீதிபதியை நீக்கும் முறையை அச்சு அசலாக ஒத்துள்ளதால், சமூக ரீதியாகவும் அரசியல் தளத்திலும் இது “தலைமைத் தேர்தல் ஆணையரின் பதவி நீக்கம்” என்றே குறிப்பிடப்படுகிறது.

தலைமைத் தேர்தல் ஆணையரை நீக்குவதற்கான காரணங்களும் வழிமுறைகளும்

தலைமைத் தேர்தல் ஆணையரை தன்னிச்சையாகப் பதவியிலிருந்து நீக்கிவிட முடியாது. அதற்கு பின்வரும் இரண்டு முக்கியக் காரணங்கள் இருக்க வேண்டும்.

நிரூபிக்கப்பட்ட தவறான நடத்தை: அதிகாரத்தை தவறாக பயன்படுத்துதல் அல்லது ஒருதலைப்பட்சமாக செயல்படுதல்.

பணியாற்ற இயலாமை : உடல் ரீதியாகவோ அல்லது மன ரீதியாகவோ தன் கடமைகளைச் செய்ய முடியாத நிலை.

நீக்கும் செயல்முறை

குற்றச்சாட்டுகள் எழுந்தால், அதை விசாரிக்க உச்ச நீதிமன்ற நீதிபதி, உயர் நீதிமன்றத் தலைமை நீதிபதி மற்றும் ஒரு சட்ட வல்லுநர் அடங்கிய 3 நபர் குழு உருவாக்கப்படும்.
குற்றச்சாட்டு உண்மை என அக்குழு உறுதிசெய்தால், அந்தத் தீர்மானம் நாடாளுமன்ற இரு அவைகளிலும் விவாதத்திற்கு வரும். அவைக்கு வருகை தந்து வாக்களிக்கும் உறுப்பினர்களில் மூன்றில் இரண்டு பங்கு ஆதரவுடன் ஒரே கூட்டத்தொடரில் தீர்மானம் நிறைவேற்றப்பட வேண்டும்.

குடியரசுத் தலைவர் உத்தரவு

இரு அவைகளிலும் தீர்மானம் நிறைவேற்றப்பட்ட பிறகு, குடியரசுத் தலைவரின் ஒப்புதலுக்கு அனுப்பப்பட்டு, அவர் மூலம் இறுதி நீக்கல் உத்தரவு பிறப்பிக்கப்படும்.

பிற தேர்தல் ஆணையர்களை நீக்கும் முறை

தலைமைத் தேர்தல் ஆணையருக்கும், மற்ற தேர்தல் ஆணையர்களுக்கும் (ECs) பதவி நீக்க நடைமுறையில் வேறுபாடு உள்ளது. பிற தேர்தல் ஆணையர்களை நீக்க நாடாளுமன்றத்தின் சிறப்புப் பெரும்பான்மை அல்லது நீண்ட விசாரணை நடைமுறைகள் தேவையில்லை. அரசியலமைப்புப் பிரிவு 324(5)-ன் படி, தலைமைத் தேர்தல் ஆணையரின் பரிந்துரையின் பேரில், குடியரசுத் தலைவர் நேரடியாகப் பிற தேர்தல் ஆணையர்களைப் பதவியிலிருந்து நீக்க முடியும்.

தேர்தல் ஆணையத்திற்குள் வெடித்துள்ள தற்போதைய சர்ச்சை

ஊடகங்களின் தகவல் படி, தேர்தல் ஆணையத்தின் உள்நிர்வாகத்தில் கருத்து வேறுபாடுகள் நிலவுவது தெரியவந்துள்ளது. எஸ்.ஐ.ஆர் தயாரிப்பு மற்றும் முடிவுகள் குறித்துத் தேர்தல் ஆணையத்தின் மூன்று நபர் குழுவிற்குள் முரண்பாடுகள் எழுந்துள்ளன. தலைமைத் தேர்தல் ஆணையர் ஞானேஷ் குமார் தன்னிச்சையாகச் செயல்படுவதாக குற்றம்சாட்டி, சக தேர்தல் ஆணையர்களான சுக்பீர் சிங் சந்து மற்றும் விவேக் ஜோஷி ஆகிய இருவரும் கடந்த 10 மாதங்களில் குறைந்தபட்சம் 14 முறையாவது அதிகாரப்பூர்வமாகத் தங்கள் ஆட்சேபனைகளைப் பதிவு செய்துள்ளனர் என்பது குறிப்பிடத்தக்கது.