வரும் அக்டோபர் 15 முதல் டிஜிட்டல் பணப்பரிவர்த்தனைகளில் முக்கிய மாற்றங்கள் அமலுக்கு வரவுள்ளன. யுபிஐ தளத்தின் மூலம் ரூ. 2,000-க்கு மேல் செய்யப்படும் கட்டணப் பரிவர்த்தனைகளுக்கு 0.40% வணிகர் தள்ளுபடி விகிதம் (MDR – Merchant Discount Rate) விதிக்கப்படும் என அறிவிக்கப்பட்டுள்ளது. இருப்பினும், ரயில்வே போன்ற அத்தியாவசிய சேவைகளுக்கு இதில் சிறப்பு விலக்கு அளிக்கப்பட்டுள்ளது.

ரயில்வே கட்டணங்களுக்கு நிர்ணயம் செய்யப்பட்டுள்ள எம்டிஆர் விதிகள், பொதுப் பயன்பாட்டுச் சேவைகள், எரிசக்தி, தொலைத்தொடர்பு மற்றும் காப்பீடு ஆகிய அத்தியாவசிய சேவைகளின் கீழ் இந்திய ரயில்வே வகைப்படுத்தப்பட்டுள்ளது.

பொது வணிகர்கள்

சாதாரண சில்லறை வர்த்தகக் கடைகளில் ரூ. 2,000-க்கு மேல் யுபிஐ மூலம் கட்டணம் செலுத்தினால், வணிகர்களுக்கு 0.40% எம்டிஆர் வசூலிக்கப்படும் (உதாரணமாக, ரூ.10,000 கட்டணத்திற்கு ரூ. 40 எம்டிஆர் விதிக்கப்படும்).

ரயில்வே கட்டணம்

ரயில் பயணச் சீட்டுகளைப் பொறுத்தவரை, டிக்கெட்டின் மொத்த மதிப்பு எவ்வளவு அதிகமாக இருந்தாலும் (ரூ. 2,000-க்கு மேல் இருந்தால்), கட்டணத்தில் 0.4% விதிக்கப்படாது; மாறாக, நிலையான ரூ. 5 மட்டுமே எம்டிஆர் ஆக நிர்ணயிக்கப்பட்டுள்ளது.

பயணிகளின் தலையில் இந்த ரூ.5 சுமை விழுமா?

யுபிஐ மூலம் ரூ. 2,000-க்கும் அதிகமான மதிப்பிலான ரயில் டிக்கெட்டுகளை முன்பதிவு செய்யும் பயணிகளுக்கு இது குறித்த பெரிய சந்தேகம் எழுந்துள்ளது. பயணிகள் தங்கள் சொந்தப் பணத்திலிருந்து கூடுதலாக ஒரு ரூபாய் கூட செலுத்தத் தேவையில்லை. அரசாங்கத்தின் முறைப்படியான விதிகளின்படி, எம்டிஆர் கட்டணம் எப்போதும் சேவை வழங்கும் வணிகரிடமிருந்து மட்டுமே வசூலிக்கப்படும். இந்த செலவை வாடிக்கையாளர்கள் மீது சுமத்தக் கூடாது என்பது சட்டப்பூர்வ விதியாகும்.

உதாரணத்திற்கு, நீங்கள் ஐஆர்சிடிசி செயலி அல்லது இணையதளம் வழியாக ரூ. 3,000 மதிப்பிலான ரயில் டிக்கெட்டை முன்பதிவு செய்தால், உங்கள் வங்கிக் கணக்கிலிருந்து சரியாக ரூ. 3,000 மட்டுமே பிடித்தம் செய்யப்படும். கூடுதல் கட்டணமான ரூ. 5-ஐ சேவை வழங்கும் ஐஆர்சிடிசி / ரயில்வே மட்டுமே ஏற்றுக்கொள்ளும்.

இந்திய ரயில்வேக்கு ஏற்படும் ரூ.18 கோடி கூடுதல் நிதிச் சுமை

சாதாரண தனிநபருக்கு ரூ. 5 என்பது சிறிய தொகையாகத் தோன்றினாலும், நாள்தோறும் லட்சக்கணக்கான பரிவர்த்தனைகளை கையாளும் இந்திய ரயில்வேக்கு இது கணிசமான நிதிச் சுமையை ஏற்படுத்துகிறது. தினமும் ரூ. 2,000-க்கு மேல் மதிப்புடைய சுமார் 1 லட்சம் ரயில் டிக்கெட்டுகள் யுபிஐ மூலம் முன்பதிவு செய்யப்படுகின்றன.

இதன் மூலம் நாளொன்றிற்கு சுமார் ரூ. 5 லட்சம் வரை எம்டிஆர் தொகையாக உருவாகிறது. ஒரு ஆண்டிற்கு (365 நாட்களுக்கு) கணக்கிட்டால், இந்தச் சிறிய கட்டணம் ரயில்வே நிர்வாகத்திற்கு சுமார் ரூ. 18.25 கோடி கூடுதல் செலவை ஏற்படுத்தும்.
இருப்பினும், டிஜிட்டல் பணப்பரிவர்த்தனைகளை ஊக்குவிக்கும் நோக்கில், இந்த நிதிச் சுமையை பயணிகள் மீது சுமத்தாமல் ரயில்வே மற்றும் வங்கிகளே முழுமையாக ஏற்றுக்கொள்கின்றன.