குளியலறையின் சுத்தத்தைப் போலவே, அதன் வாசலில் விரிக்கும் பாத்ரூம் மேட்டைப் பராமரிப்பதும் மிக முக்கியம். தினமும் ஈரமான பாதங்களுடன் மிதிப்பதால், கண்ணுக்குத் தெரியாத கிருமிகள், பாக்டீரியா மற்றும் பூஞ்சை காளான்கள் பெருகுவதற்கு இது ஏதுவான இடமாக மாறுகிறது.

மேட்டை எத்தனை நாட்களுக்கு ஒருமுறை துவைக்க வேண்டும்?

வாரத்திற்கு ஒருமுறை பாத்ரூம் மேட்டைத் துவைப்பது நல்லது. வீட்டில் நபர்கள் அதிகமாக இருந்தாலோ அல்லது காற்றோட்டம் குறைவாக இருந்தாலோ வாரத்திற்கு 2 முறை துவைக்க வேண்டும். வீட்டில் குழந்தைகள் அல்லது முதியவர்கள் இருந்தால், சுகாதாரத்தை உறுதி செய்ய 4 முதல் 5 நாட்களுக்கு ஒருமுறை துவைப்பது பாதுகாப்பானது. ஈரப்பதம் அதிகமாக இருக்கும் மழைக்காலத்தில் மேட் எளிதில் காயாது. எனவே, இரண்டு மேட்களை வைத்துக்கொண்டு மாற்றி மாற்றிப் பயன்படுத்துவது சிறந்த வழி.

துவைப்பதற்கு முன் செய்ய வேண்டியவை

மேட்டை நேரடியாகத் தண்ணீரில் போடுவதற்கு முன், வெளிப்புறத்தில் கொண்டு சென்று நன்றாக உதற வேண்டும்.

வேக்கம் கிளீனர் இருந்தால், மேட்டின் இருபுறமும் உள்ள முடி, உதிர்ந்த சருமத் துகள்கள் மற்றும் உலர்ந்த தூசிகளைத் துப்புரவு செய்துவிட்டுப் பின் துவைக்கலாம்.

துவைக்கும் போது கவனிக்க வேண்டிய முக்கிய அம்சங்கள்

மேட்களைத் துவைக்க வீரியம் குறைந்த சோப்புத் தூள்களைப் பயன்படுத்த வேண்டும்.

அடிப்பகுதியில் ரப்பர் பூச்சு உள்ள மேட்களை சூடான தண்ணீரில் துவைப்பதோ அல்லது அதிக வெப்பத்தில் காயவைப்பதோ கூடாது. அது ரப்பரை உருக்கிச் சேதப்படுத்திவிடும்.

துவைத்த பிறகு சோப்பு நுரை அல்லது எச்சங்கள் சிறிதும் இல்லாதவாறு சுத்தமான தண்ணீரில் அலச வேண்டும்.

துர்நாற்றம் மற்றும் கிருமிகளை நீக்கும் எளிய வழிகள்

மேட்டில் துர்நாற்றம் அடித்தால், துவைப்பதற்கு 20 நிமிடங்களுக்கு முன் அதன் மீது சிறிதளவு பேக்கிங் சோடாவைத் தூவி வைக்கவும். பிறகு உதறிவிட்டுத் துவைத்தால் துர்நாற்றம் நீங்கும்.

கிருமிநாசினியாக வினிகரைப் பயன்படுத்த விரும்பினால், அதை நேரடியாக ஊற்றாமல் தண்ணீரில் கலந்து பயன்படுத்த வேண்டும் (வினிகரை ஒருபோதும் ப்ளீச்சிங் பவுடருடன் கலக்கக் கூடாது).

உலர்த்துதல் மற்றும் தினசரி பராமரிப்பு குறிப்புகள்

மேட்டின் மேல்பகுதி மட்டுமின்றி, அடிப்பகுதியும் நடுப்பகுதியும் முழுமையாகக் காய வேண்டும். ஈரம் இருக்கும்போதே மீண்டும் பயன்படுத்தினால் பாக்டீரியாக்கள் வேகமாகப் பெருகும்.

முடிந்தவரை நல்ல காற்றோட்டமுள்ள இடத்திலோ அல்லது வெயிலிலோ காயவைப்பது கிருமிகளை அழிக்கும்.

குளித்துவிட்டு வந்த பிறகு ஈரமான மேட்டை சுருட்டி வைப்பதைத் தவிர்க்க வேண்டும். அதைத் தட்டையாக விரித்து வைத்து, அவ்வப்போது திருப்பிப் போட்டு இருபுறமும் உலர வைக்கலாம்.

மேட்டிற்கு அடியில் உள்ள தரைப் பகுதியையும் அவ்வப்போது துடைத்து உலர்வாக வைத்திருக்க வேண்டும்.

எப்போது மாற்ற வேண்டும்?

மேட்டின் நீரை உறிஞ்சும் திறன் குறைந்தாலோ, ரப்பர் பகுதி பிளந்து உதிர்ந்தாலோ அல்லது துவைத்தும் கறைகள் மற்றும் துர்நாற்றம் போகவில்லை என்றாலோ புதிய மேட்டிற்கு மாறுவது நல்லது. அத்துடன், குளித்த பிறகு பாத்ரூம் கதவு மற்றும் ஜன்னல்களைத் திறந்து வைத்து எக்ஸாஸ்ட் ஃபேனை இயக்குவது, குளியலறை மற்றும் மேட் இரண்டிலுமே ஈரப்பதம் தங்குவதை குறைக்கும்.