நாட்டின் பல்வேறு இடங்களில் பழைய மின்சார மீட்டர்களுக்குப் பதிலாக டிஜிட்டல் ஸ்மார்ட் மீட்டர்கள் (Smart Meters) வேகப் படுத்தப்பட்டு வருகின்றன. இந்நிலையில், ஸ்மார்ட் மீட்டர் பொருத்துவதால் மின்சாரக் கட்டணம் உயருமா? என்ற அச்சமும் சந்தேகமும் பல நுகர்வோர்களிடையே நிலவுகிறது.

ஸ்மார்ட் மீட்டர்கள் மின்சாரப் பயன்பாட்டைப் பதிவு செய்யும் முறையை மட்டுமே மாற்றுகின்றனவே தவிர, ஒரு யூனிட் மின்சாரத்தின் விலையையோ அல்லது கட்டண விகிதங்களையோ சுயமாக மாற்றுவது கிடையாது. மின்சாரத்தின் ஒரு யூனிட் விலை மற்றும் அதனுடன் சேர்க்கப்படும் இதர கட்டணங்கள் அனைத்தும் அந்தந்த மாநில மின்சார ஒழுங்குமுறை ஆணையத்தால் (TNERC / State Electricity Regulatory Commission) மட்டுமே தீர்மானிக்கப்படுகின்றன.

ஸ்மார்ட் மீட்டர்களின் முக்கிய நன்மைகள்

மின்சார வாரிய ஊழியர்கள் வீட்டிற்கு நேரடியாக வந்து ரீடிங் எடுக்க வேண்டிய அவசியம் இல்லை. நுகர்வு விவரங்கள் டிஜிட்டல் முறையில் நேரடியாகக் கணக்கிடப்பட்டு புதுப்பிக்கப்படும்.

நேரடி பயன்பாட்டு கண்காணிப்பு (Real – time Tracking)

நுகர்வோர்கள் தங்கள் தினசரி மின்சார நுகர்வை செயலி (App) அல்லது இணையதளம் வாயிலாக உடனுக்குடன் கண்காணித்து, மின்சார வீணடிப்பைக் குறைக்க முடியும்.

துல்லியமான கணக்கீடு

மனித தவறுகளால் ரீடிங் எடுப்பதில் ஏற்படும் பிழைகள் முற்றிலும் தவிர்க்கப்பட்டு, உண்மையான பயன்பாட்டிற்கு மட்டுமே கட்டணம் கணக்கிடப்படும்.

ப்ரீபெய்ட் வசதி (Prepaid Facility)

மொபைல் ரீசார்ஜ் செய்வது போலவே, தேவையான அளவிற்கு மின்சாரத்திற்கு முன்பணம் செலுத்தி பயன்படுத்தும் வசதி கிடைக்கும். இதில் குறைந்த தொகையிலான ரீசார்ஜ், பயன்பாட்டு எச்சரிக்கை மற்றும் அவசரக் கடன் (Emergency Credit) போன்ற சலுகைகளும் உண்டு.

ஸ்மார்ட் மீட்டர்களில் உள்ள சவால்கள்

ப்ரீபெய்ட் முறையில் பயன்படுத்தும்போது, மீட்டரில் உள்ள இருப்புத் தொகையை நுகர்வோர் தவறாமல் கண்காணிக்க வேண்டும். இருப்பு பூஜ்ஜியமானால் மின் விநியோகம் தானாகவே துண்டிக்கப்பட வாய்ப்புள்ளது.

தொழில்நுட்ப தடங்கல்கள்

நெட்வொர்க் அல்லது சர்வர் கோளாறுகள் ஏற்படும் சமயங்களில் ரீசார்ஜ் செய்வதிலும், பயன்பாட்டுத் தரவுகளை புதுப்பிப்பதிலும் தாமதம் ஏற்படலாம்.

ஸ்மார்ட் மீட்டரால் மின் கட்டணம் உயருமா?

ஸ்மார்ட் மீட்டர் வைப்பதால் மட்டும் மின் கட்டணம் உயராது. நீங்கள் பயன்படுத்தும் மின்சாரத்தின் அளவும், அரசு நிர்ணயித்துள்ள கட்டண விகிதமுமே உங்கள் மின்கட்டணத்தைத் தீர்மானிக்கின்றன. இருப்பினும், பழைய மெக்கானிக்கல் மீட்டர்கள் தேய்மானம் காரணமாக குறைந்த அளவிலான பயன்பாட்டைப் பதிவு செய்திருக்கக் கூடும்.

ஆனால் ஸ்மார்ட் மீட்டர்கள் மிகவும் துல்லியமாக மின் நுகர்வைப் பதிவு செய்வதால், சிலருக்கு கட்டணத்தில் சிறிய மாற்றம் இருப்பது போல் தோன்றலாம். ஒட்டுமொத்தமாக, ஸ்மார்ட் மீட்டர்கள் நுகர்வோர் தங்கள் மின்சாரப் பயன்பாட்டைத் துல்லியமாக அறிந்து கொள்ளவும், மின்சாரத்தைச் சேமிக்கவும் உதவும் ஒரு நவீன தொழில்நுட்பமாகும்.