சருமத்தை அழகாகவும் பொலிவாகவும் வைத்துக்கொள்ள பெரும்பாலானோர் அதிக விலை கொண்ட கிரீம்கள், சீரம்கள் மற்றும் அழகு நிலைய சிகிச்சைகளைத் நாடுகின்றனர். இருப்பினும், வெளிப்புறப் பராமரிப்புகளை விட நாம் அன்றாடம் உட்கொள்ளும் சத்தான உணவுகளே சருமத்திற்கு உண்மையான, இயற்கையான பளபளப்பை தருகின்றன என ஊட்டச்சத்து நிபுணர்கள் கூறுகின்றனர்.

பழங்கள், காய்கறிகள், வைட்டமின்கள் மற்றும் ஆன்டிஆக்ஸிடன்ட்கள் நிறைந்த சாலட்களை உணவில் சேர்த்துக்கொள்வது உடலில் உள்ள நச்சுக்களை வெளியேற்றி, சருமத்தை உள்ளிருந்து ஆரோக்கியமாக்கும்.

பீட்ரூட் சாலட் (ரத்த சுத்திகரிப்பிற்கு)

பீட்ரூட் ரத்தத்தை சுத்திகரித்து முகத்திற்கு இயற்கையான சிவப்பு நிறப் பொலிவைத் தரும் திறன் கொண்டது.

தயாரிக்கும் முறை: அரை கப் துருவிய பீட்ரூட்டுடன் 1 ஸ்பூன் தயிர், சிறிதளவு எலுமிச்சை சாறு மற்றும் கொத்தமல்லி இலைகளைக் கலந்து கொள்ளவும். இதை மதிய உணவிலோ அல்லது மாலை நேர சிற்றுண்டியாகவோ தினமும் சாப்பிட்டு வர சருமம் நல்ல பிரகாசம் பெறும்.

அவகாடோ சாலட் (ஈரப்பதத்திற்கு)

அவகாடோவில் (Avocado) உள்ள ஆரோக்கியமான நல்ல கொழுப்புகள் சருமத்தின் வறட்சியைப் போக்கி ஈரப்பதத்துடன் வைத்திருக்க உதவுகின்றன.

தயாரிக்கும் முறை: பாதி அவகாடோ பழத்துடன் செர்ரி தக்காளி, லெட்டூஸ் (Lettuce) மற்றும் சிறிதளவு ஆலிவ் எண்ணெய் கலந்து கொள்ளவும். தொடர்ந்து சாப்பிட்டு வர சருமம் மிருதுவாகவும் மென்மையாகவும் மாறும்.

வெள்ளரிக்காய் – புதினா சாலட் (குளிர்ச்சிக்கு)

வெள்ளரிக்காய் மற்றும் புதினா கலவை சருமத்தை குளிர்ச்சியாக வைத்து, வீக்கங்கள் மற்றும் தடிப்புகளைக் குறைக்க உதவும்.

தயாரிக்கும் முறை: நறுக்கிய வெள்ளரிக்காய் துண்டுகள், புதினா இலைகள், எலுமிச்சை சாறு மற்றும் சிறிதளவு எள் சேர்த்து தயாரிக்க வேண்டும். இது சருமத்திற்குத் தேவையான நீர்ச்சத்தை வழங்கி புத்துணர்ச்சியளிக்கும்.

பெர்ரி ஆன்டி ஆக்ஸிடன்ட் சாலட் (இளமைக்கு)

ஸ்ட்ராபெர்ரி, பிளாக்பெர்ரி போன்ற பெர்ரி பழங்களில் ஆன்டிஆக்ஸிடன்ட்கள் நிறைந்துள்ளன. இவை சருமத்தில் கொலாஜன் (Collagen) உற்பத்தியை அதிகரிக்கின்றன.

தயாரிக்கும் முறை: பெர்ரி பழங்கள், பாலக்கீரை, வால்நட்ஸ் மற்றும் சியா விதைகளைக் (Chia Seeds) கலந்து கொள்ளவும். இது முகத்தில் சுருக்கங்கள் ஏற்படுவதை தடுத்து, வயதான தோற்றத்தைத் தாமதப்படுத்தும்.

கேரட் – ஆரஞ்சு சாலட் (வைட்டமின் சி நிறைந்தது)

கேரட் மற்றும் ஆரஞ்சில் உள்ள வைட்டமின் சி மற்றும் பீட்டா கரோட்டின் சருமத்தில் உள்ள மந்தமான தன்மையைப் போக்கும்.

தயாரிக்கும் முறை: துருவிய கேரட், ஆரஞ்சு சுளைகள், உலர் திராட்சை மற்றும் பூசணி விதைகளை கலந்து தயாரிக்க வேண்டும். சருமத்தின் சேதமடைந்த செல்களை சீரமைத்து முகத்திற்கு உடனடிப் பொலிவைத் தரும்.

நிபுணர்களின் கூடுதல் ஆலோசனைகள்

இரசாயனப் பொருட்களை முகத்தில் பூசுவதை விட, உடலுக்குத் தேவையான ஊட்டச்சத்துக்களை உணவு வழியாக வழங்குவதே நிரந்தர அழகைத் தரும். தினமும் போதுமான அளவு தண்ணீர் குடிப்பது சருமத்தை வறட்சியடையாமல் காக்கும். ஆழ்ந்த உறக்கம் மற்றும் மன அழுத்தமில்லாத வாழ்க்கை முறை சரும ஆரோக்கியத்திற்கு மிகவும் அத்தியாவசியமானவை.