வாழைப்பழம் சாப்பிடத்தும் அதன் தோலை நாம் என்ன செய்வோம்? தூக்கி வீசி விடுவோம். ஆனால், அதிகமான நார்ச்சத்தும், பல அபூர்வ ஊட்டச்சத்துகளும் அதன் தோலில்தான் பொதிந்துள்ளன. இயற்கை நமக்கு அளித்த இந்த ஊட்டச்சத்து பெட்டகத்தை வீணாக்காமல் எவ்வாறு உணவாக்கலாம் என்பதைப் பார்ப்போம்.

வாழைப்பழத் தோலில் உள்ள ஊட்டச்சத்துக்கள்

தாது உப்புகள்: பொட்டாசியம், மெக்னீசியம் மற்றும் இரும்புச்சத்து.

அமினோ அமிலங்கள்: டிரிப்டோபான் (Tryptophan) உள்ளிட்ட அத்தியாவசிய அமினோ அமிலங்கள்.

ஆன்டி-ஆக்ஸிடன்ட்கள்: லூட்டின் (Lutein), கரோட்டினாய்டுகள், பாலிஃபீனால்கள் (Polyphenols).

வைட்டமின்கள்: வைட்டமின் B6, B12 மற்றும் ஆரோக்கியமான கொழுப்பு அமிலங்கள்.

ஆரோக்கிய நன்மைகள்

வாழைப்பழத் தோலில் உள்ள லூட்டின் எனும் சக்திவாய்ந்த ஆன்டி- ஆக்ஸிடன்ட், மொபைல் மற்றும் கணினித் திரைகளில் இருந்து வரும் நீல ஒளி மற்றும் ஆக்சிஜனேற்ற அழுத்தத்திலிருந்து கண்ணின் மாக்குலா பகுதியைப் பாதுகாக்கிறது. இது வயது முதிர்வால் ஏற்படும் கண் பார்வைக் கோளாறுகளைத் தடுக்க உதவும்.

சீரான தூக்கம் மற்றும் மன அமைதி

இதிலுள்ள டிரிப்டோபான் அமினோ அமிலம், மூளையில் ‘செரோட்டோனின்’ (Serotonin) ஹார்மோன் உற்பத்தியைத் தூண்டுகிறது. இது மன அழுத்தத்தைக் குறைத்து, மூளையை அமைதிப்படுத்தி இரவில் ஆழ்ந்த தூக்கத்தைப் பெற வழிவகுக்கிறது.

குடல் ஆரோக்கியம் மற்றும் செரிமானம்

தோலில் உள்ள அதிகப்படியான நார்ச்சத்து குடலில் உள்ள நன்மை பயக்கும் பாக்டீரியாக்களுக்கு ‘பிரிபயாடிக்’ (Prebiotic) உணவாகச் செயல்படுகிறது. இது செரிமான மண்டலத்தை சீராக்கி, மலச்சிக்கல் ஏற்படாமல் பாதுகாக்கிறது.

இரத்த அழுத்தம் மற்றும் இதய நலம்

இதில் நிறைந்துள்ள பொட்டாசியம் மற்றும் மெக்னீசியம், உடலின் சோடியம் அளவைச் சமன் செய்து இரத்த அழுத்தத்தைக் கட்டுக்குள் வைத்திருக்க உதவுகின்றன. இது இதயத்தின் ஆரோக்கியத்தை மேம்படுத்துகிறது.

கொலஸ்ட்ரால் குறைப்பு

தோலில் உள்ள ‘பெக்டின்’ (Pectin) எனப்படும் கரையக்கூடிய நார்ச்சத்து, இரத்தத்தில் உள்ள கெட்ட கொழுப்பின் (LDL) அளவைக் குறைக்கத் துணைபுரிகிறது.

வாழைப்பழத் தோலை உணவாகப் பயன்படுத்தும் முறைகள்

தோலை அப்படியே பச்சையாகச் சாப்பிடுவது சற்று கடினமாக இருக்கலாம். எனவே பின்வரும் முறைகளில் அதைத் தயார் செய்யலாம்.

தோலின் வெளிப்புறத்தில் பூச்சிக்கொல்லி மருந்துகள் இருக்க வாய்ப்புள்ளதால், காம்பு மற்றும் அடிப் பகுதியை நீக்கிவிட்டு, உப்பு மற்றும் பேக்கிங் சோடா கலந்த வெதுவெதுப்பான நீரில் 10–15 நிமிடங்கள் ஊறவைத்து நன்றாகக் கழுவ வேண்டும்.

பழுத்த பழங்களைத் தேர்வு செய்தல்

பழம் எந்த அளவுக்கு நன்றாக பழுத்திருக்கிறதோ, அந்த அளவுக்கு தோலும் மென்மையாகவும், கசப்பு குறைந்தும், இனிப்புத் தன்மையுடனும் இருக்கும்.

ஸ்மூத்தி

நன்றாகக் கழுவிய தோலைச் சிறு துண்டுகளாக நறுக்கி, ஆப்பிள், பால் அல்லது தயிருடன் சேர்த்து மிக்ஸியில் அடித்து சத்தான ஸ்மூத்தியாக அருந்தலாம்.

வாழைப்பழத் தோல் தேநீர்

தோலைத் தண்ணீரில் 10 நிமிடங்கள் நன்றாகக் கொதிக்க வைத்து, அந்த நீரினை வடிகட்டித் தேன் அல்லது எலுமிச்சைச் சாறு கலந்து மூலிகை தேநீராகக் குடிக்கலாம்.

சமையல் செய்து உண்ணுதல்

தெற்காசியா மற்றும் கரீபியன் உணவு முறைகளில் தோலைச் சிறு துண்டுகளாக நறுக்கி பொரியல், கூட்டு அல்லது வதக்கி சாப்பிடும் வழக்கம் உள்ளது. சமைக்கும் போது தோலின் நார்ச்சத்தின் அடர்த்தி குறைந்து, எளிதில் செரிமானமாகும்.

பேக்கிங் மற்றும் சிப்ஸ்

தோலை லேசாக ஓவனில் பேக் செய்தோ அல்லது குறைந்த எண்ணெயில் வறுத்தோ ஆரோக்கியமான நொறுக்குத் தீனியாகப் பயன்படுத்தலாம்.

கவனிக்க வேண்டியவை

வாழைப்பழத் தோலை உணவில் சேர்க்கத் தொடங்கும் போது, ஆரம்பத்தில் மிகச் சிறிய அளவில் மட்டுமே எடுத்துக்கொள்ள வேண்டும்.

அதிக நார்ச்சத்து இருப்பதால், செரிமானக் கோளாறுகள் அல்லது குடல் அழற்சி நோய் உள்ளவர்கள் மருத்துவ ஆலோசனையைப் பெற்ற பின்னரே இதனை உணவில் சேர்த்துக்கொள்வது பாதுகாப்பானது.