தமிழ்நாடு முதல்வர் விஜய்யின் மகன் ஜேசன் சஞ்சய் முதன்முறையாக இயக்கும் ‘சிக்மா’ திரைப்படத்தின் விளம்பர நிகழ்வில், தெலுங்கு மெகாஸ்டார் சிரஞ்சீவி பகிர்ந்த வார்த்தைகள் பெரும் கவனத்தைப் பெற்றுள்ளன.

இந்த நிகழ்ச்சியில் பேசிய சிரஞ்சீவி, 90-களின் தொடக்கத்தில் தமிழ் சினிமாவில் பிரகாசித்த விஜய்யின் அதே தோற்றத்தில் தான் ஜேசன் சஞ்சய் இருப்பதாகச் சிரஞ்சீவி கூறினார். ஜேசனின் இயக்குனர் திறமைக்கு பின்னணியில் விஜய்யை விட அவரது தாத்தாவும் பாட்டியும் தான் அதிகம் இருக்கிறார்கள் என்றும் அவர் குறிப்பிட்டார்.

நிகழ்வில் தனது நினைவுகளைப் பகிர்ந்த சிரஞ்சீவி, “இந்த விழாவிற்கு என்னை அழைப்பதற்காக ஜேசன் வந்தபோது நான் அவரிடம், 1993-95 காலகட்டத்தில் உன்னுடைய தந்தை எப்படி இருந்தாரோ, அதேபோலத்தான் உன்னைப் பார்ப்பதற்கும் இருக்கிறது. இயக்கத்திற்குப் பதிலாக நீ ஏன் நடிக்கக்கூடாது என்று கேட்டேன். ஆனால், எழுத்திலும் இயக்கத்திலும்தான் எனக்கு பல ஆண்டுகளாக ஆர்வம் இருக்கிறது, அதிலேயே தொடர்ந்து பயணிக்க விரும்புவதாகவும் ஜேசன் பதிலளித்தார்.

ஜேசனின் இயக்குனர் திறமைக்கு பின்னணியில் அவரது தாத்தாவும் பாட்டியும்தான் இருக்கிறார்கள். விஜய்யின் தந்தையும் இயக்குநருமான எஸ்.ஏ. சந்திரசேகர், கதையாசிரியரான தாய் ஷோபா ஆகியோரிடமிருந்தே ஜேசனுக்‌கு இந்தத் திறமை பரம்பரையாகக் கிடைத்துள்ளது. நான் நடித்த ‘சட்டனிகி கல்லு லேவு’, ‘தேவாந்தகுடு’ போன்ற புகழ்பெற்ற தெலுங்குத் திரைப்படங்களை இயக்கியது சந்திரசேகர் தான். இவற்றின் கதையை எழுதியது ஷோபா.

தாத்தாவும் தந்தையும் சினிமாவில் மிகப்பெரிய உயரங்களைத் தொட்டவர்கள், ஜேசன் சஞ்சய்யும் தனது முதல் படமான ‘சிக்மா’ மூலம் அந்த வெற்றியை மீண்டும் படைக்க வாழ்த்துவதாகவும் சிரஞ்சீவி கூறினார்.

சந்தீப் கிஷன் நாயகனாக நடிக்கும் ‘சிக்மா’ அக்டோபர் 2 அன்று திரையரங்குகளில் வெளியாகிறது. இயக்குநராக ஜேசன் அறிமுகமாகும் இந்தப் படத்திற்காக சினிமா ரசிகர்களும் விஜய் ரசிகர்களும் மிகுந்த எதிர்பார்ப்புடன் காத்திருக்கின்றனர். தமன் எஸ். இசையமைக்கும் இந்தப் படத்தின் தயாரிப்பாளர் ஜி.கே.எம். தமிழ் குமரன் ஆவார். தமிழ்நாடு மற்றும் தாய்லாந்தில் இதன் படப்பிடிப்பு நிறைவடைந்தது.

சந்தீப் கிஷான் தவிர்த்து இந்தப் படத்தில் ராஜு சுந்தரம், சம்பத் ராஜ், ஷிவ் பண்டிட், அன்பு தாசன், யோக் ஜாபி, மகாலட்சுமி, ஷீலா ராஜ்குமார், கமலேஷ், கிரண் கொண்டா உள்ளிட்ட பிரபல நட்சத்திரங்களும் நடித்துள்ளனர்.