பண்டைய காலம் தொட்டே இந்தியப் பெண்களின் தினசரி அழகியல் மற்றும் சருமப் பராமரிப்பில் மஞ்சளுக்கு மிக முக்கிய இடமுண்டு. இருப்பினும், நவீன அழகுப் பராமரிப்பு உலகத்தில் "முகத்திற்கு நேரடியாக மஞ்சள் பூசுவது பாதுகாப்பானதா?" என்ற கேள்வி பலரிடமும் எழுந்துள்ளது.

மஞ்சளில் நிறைந்துள்ள மருத்துவ குணங்கள் என்னென்ன, அதை எவ்வாறு சரியாகப் பயன்படுத்த வேண்டும் மற்றும் தோல் மருத்துவர்கள் எச்சரிக்கும் விஷயங்கள் குறித்து விரிவாக பார்ப்போம்.

மஞ்சளின் அசாத்திய மருத்துவ நன்மைகள்

மஞ்சளில் உள்ள 'குர்குமின்' (Curcumin) என்ற சக்திவாய்ந்த வேதிப்பொருள் கிருமிநாசினியாகவும் அலர்ஜி எதிர்ப்பியாகவும் செயல்படுகிறது. இது முகப்பருவை உண்டாக்கும் பாக்டீரியாக்களை அழித்து, பருக்களால் ஏற்படும் வடுக்களை மறைக்கிறது.

சருமத்தில் உள்ள இறந்த செல்களை நீக்கி, இரத்த ஓட்டத்தை சீராக்குகிறது. மஞ்சள் தூளுடன் பால் அல்லது தேன் கலந்து பூசி வர, முகம் தங்க நிற ஜொலிப்பைப் பெறும்.

சூரியனின் புற ஊதாக்கதிர்களால் சுருக்கங்கள் விழுவதைத் தடுத்து, சருமத்தின் நெகிழ்வுத்தன்மையை மஞ்சள் பாதுகாக்கிறது. மேலும், முகத்தில் உள்ள மெல்லிய தேவையற்ற முடிகளின் வளர்ச்சியை படிப்படியாகக் கட்டுப்படுத்துகிறது.

தோல் மருத்துவர்கள் தரும் எச்சரிக்கைகள் – பக்கவிளைவுகள்

மஞ்சள் இயற்கை மருந்து என்றாலும், அதை நேரடியாகவும் தவறாகவும் பயன்படுத்தும்போது சில பிரச்சனைகள் வரக்கூடும். சென்சிடிவ் சருமம் கொண்டவர்களுக்கு மஞ்சள் அரிப்பு, சிவந்து போதல் அல்லது தடிப்புகளை ஏற்படுத்தலாம்.

சமையலுக்குப் பயன்படுத்தும் மஞ்சளில் காரத்தன்மையும், செயற்கை நிறமூட்டிகளும் கலந்திருக்க வாய்ப்புள்ளதால், அதை நேரடியாக முகத்திற்கு பூசக்கூடாது.

சுத்தமான கஸ்தூரி மஞ்சளைக் கூட நீண்ட நேரம் முகத்தில் வைத்திருந்தால், அது சருமத் துளைகளை அடைத்து தற்காலிக மஞ்சள் நிற கறையை உண்டாக்கும்.

எந்த சருமத்திற்கு எப்படிப் பயன்படுத்த வேண்டும்?

பேட்ச் டெஸ்ட் கட்டாயம்: மஞ்சளை முகத்தில் பூசுவதற்கு முன், காதுக்கு பின்புறம் அல்லது கையின் உட்பகுதியில் சிறிதளவு பூசி 15 நிமிடங்கள் கழித்துப் பார்த்து அலர்ஜி இல்லை என்பதை உறுதிசெய்ய வேண்டும்.

வறண்ட சருமம் : மஞ்சள் தூளுடன் சிறிதளவு காய்ச்சாத பால், தயிர் அல்லது தயிர் ஆடை கலந்து பயன்படுத்தினால் சருமத்தின் ஈர்ப்புத் தன்மை தக்கவைக்கப்படும்.

எண்ணெய் சருமம் : மஞ்சள் தூளுடன் ரோஸ் வாட்டர் அல்லது சில துளிகள் எலுமிச்சை சாறு கலந்து தடவி வர, அதிகப்படியான எண்ணெய் சுரப்பு கட்டுப்படும்.

சரியான நேரம்: மஞ்சளை முகத்தில் தடவி 10 முதல் 15 நிமிடங்களுக்கு மேல் வைக்கக் கூடாது. வாரத்திற்கு 2 அல்லது 3 முறை மட்டுமே பயன்படுத்துவது சிறந்தது.