பாஜக எங்கு இடம் கிடைத்தாலும் அங்கு நுழைந்து, அந்த இடத்தைப் பெரிதாக்கி தமிழ்நாட்டில் அரசியல் குழப்பத்தை ஏற்படுத்தலாம் என்பதில் தீவிரமாக இருப்பதாக காங்கிரஸ் மாநிலங்களவை உறுப்பினர் கிறிஸ்டோபர் திலக் தெரிவித்துள்ளார்.

திருச்சி ராஜா காலனி பகுதியில் உள்ள தனியார் ஹோட்டலில், நேஷனல் ரியல் எஸ்டேட் டெவலப்மென்ட் கவுன்சில் (NAREDCO) தமிழ்நாடு தெற்கு சார்பில் ஒருங்கிணைந்த வளர்ச்சி மற்றும் கட்டிட விதிமுறைகள் (CDBR) தொடர்பான சமீபத்திய மாற்றங்கள் மற்றும் திருத்தங்கள் குறித்த கருத்தரங்கம் நடைபெற்றது. இதில் சிறப்பு விருந்தினராக காங்கிரஸ் எம்பி கிறிஸ்டோபர் திலக் கலந்து கொண்டு குத்துவிளக்கேற்றி நிகழ்ச்சியைத் தொடங்கி வைத்து உரையாற்றினார். கட்டுமானம் மற்றும் ரியல் எஸ்டேட் துறையினர் எதிர்கொள்ளும் நடைமுறை சிக்கல்கள், CDBR விதிகளில் மேற்கொள்ளப்பட்டுள்ள மாற்றங்கள், திருத்தங்கள் மற்றும் அவற்றை நடைமுறைப்படுத்தும்போது கவனிக்க வேண்டிய அம்சங்கள் குறித்து கருத்தரங்கில் விளக்கப்பட்டது. இதில் ரியல் எஸ்டேட் மற்றும் கட்டுமானத் துறையைச் சேர்ந்தவர்கள், தொழில்துறை பிரதிநிதிகள் உள்ளிட்ட பலர் பங்கேற்றனர்.

இதைத்தொடர்ந்து செய்தியாளர்களைச் சந்தித்த கிறிஸ்டோபர் திலக், வெளிநாடுகளில் இருந்து பெறப்படும் பங்களிப்பு நிதி எவ்வாறு செலவிடப்படுகிறது என்பது தொடர்பாக அமைக்கப்பட்டுள்ள கூட்டு நாடாளுமன்றக் குழு கூட்டம் நடைபெற்றதாகவும், அதில் பல்வேறு விவகாரங்கள் குறித்து விவாதிக்கப்பட்டதாகவும் தெரிவித்தார். கடந்த குளிர்காலக் கூட்டத்தொடரில் எஃப்.சி.ஆர்.ஏ. தொடர்பாக விவாதிக்கப்பட்ட நிலையில், வரும் குளிர்காலக் கூட்டத்தொடரிலும் இந்த விவகாரம் தொடர்பாக தொடர்ந்து பேசப்படும் எனக் கூறினார்.

தேர்தல் ஆணையம் தொடர்பாகவும் அவர் பல்வேறு கருத்துகளைத் தெரிவித்தார். இந்தியாவின் முக்கிய அரசியலமைப்பு அமைப்புகளில் தேர்தல் ஆணையமும் ஒன்று என்றும், ஜனநாயகத்தின் அடித்தளமாக விளங்கும் தேர்தல்கள் முறையாகவும், நம்பகத்தன்மையுடனும் நடைபெறுகிறதா என்பது முக்கியமான கேள்வியாக உள்ளதாகவும் அவர் கூறினார். தற்போது எஸ்.ஐ.ஆர். பணியின் மூன்றாம் கட்டம் நடைபெற்று வரும் நிலையில், முந்தைய தேர்தல்களில் ஏற்பட்டதாகக் கூறப்படும் குளறுபடிகள் தொடர்பாக பல்வேறு சந்தேகங்கள் எழுந்துள்ளதாகவும் தெரிவித்தார்.

இந்தச் சூழலில் நடைபெற்ற காங்கிரஸ் காரியக் கமிட்டி கூட்டத்தில் தலைமைத் தேர்தல் ஆணையர் பதவி விலக வேண்டும் என்ற கோரிக்கை முன்வைக்கப்பட்டுள்ளதாகவும் கிறிஸ்டோபர் திலக் தெரிவித்தார். தேர்தல் ஆணையர்களைத் தேர்வு செய்யும் முறையில் முன்பு பிரதமர், எதிர்க்கட்சித் தலைவர் மற்றும் இந்திய தலைமை நீதிபதி இடம்பெற்ற தேர்வுக்குழு இருந்ததாகவும், தற்போது அந்த அமைப்பில் உள்துறை அமைச்சரும் இடம்பெறும் வகையில் மாற்றம் செய்யப்பட்டுள்ளதாகவும் அவர் குறிப்பிட்டார்.

தற்போதைய தலைமைத் தேர்தல் ஆணையர் ஞானேஷ்குமார் பிரதமர் மற்றும் மத்திய உள்துறை அமைச்சர் அமித்ஷாவுக்கு ஆதரவாக செயல்படுவதாக கிறிஸ்டோபர் திலக் குற்றம்சாட்டினார். இதன் காரணமாக அண்மையில் நடைபெற்ற தேர்தல்களின் நம்பகத்தன்மை குறித்து கேள்விகள் எழுவதாகவும் அவர் தெரிவித்தார். தேர்தல் ஆணையத்தின் செயல்பாடுகள் குறித்து எதிர்க்கட்சிகள் முன்வைக்கும் சந்தேகங்களுக்கு உரிய விளக்கம் அளிக்கப்பட வேண்டும் என்பதே தங்களது நிலைப்பாடு என்றும் அவர் கூறினார்.

தமிழக முதல்வர் மு.க.ஸ்டாலின் இந்த விவகாரம் குறித்து கருத்து தெரிவிக்க வேண்டும் என திமுக தலைவர்கள் கூறி வருவது குறித்த கேள்விக்கு பதிலளித்த அவர், எதிர்க்கட்சியாக அரசியல் செய்வதற்குப் பதிலாக யார் என்ன பேசுகிறார்கள் என முதல்வர் கருத்து தெரிவிக்கிறாரா என்று பார்ப்பதே திமுகவினரின் வேலையாக இருப்பதாக விமர்சித்தார். முதல்வர் அனைத்து விவகாரங்களுக்கும் உடனடியாக கருத்து தெரிவிப்பவர் அல்ல என்றும், ஒரு விஷயத்தை பொறுமையாகவும் நிதானமாகவும் உள்வாங்கிக் கொண்டு பின்னர் கருத்து தெரிவிப்பார் என்றும் கூறினார்.

தாய்மாமன் தங்க மோதிரம் திட்டம் தொடர்பாக கனிமொழி எம்பி தெரிவித்த விமர்சனம் குறித்தும் கிறிஸ்டோபர் திலக் பேசினார். சமூகத்தில் இன்னும் பல பிற்போக்குத்தனமான, சென்டிமென்ட் சார்ந்த விஷயங்கள் தொடர்ந்து இருப்பதாகவும், அவற்றை ஒரே நாளில் மாற்றிவிட முடியாது என்றாலும், குறிப்பிட்ட அளவில் மக்கள் கவனத்தை ஈர்ப்பதற்கும் நல்ல எண்ணத்தை உருவாக்குவதற்கும் இதுபோன்ற திட்டங்கள் தேவைப்படுவதாகவும் அவர் தெரிவித்தார்.

திமுகவின் பிரச்சாரத்தில் ஆபாசமான அல்லது இரட்டை அர்த்தம் கொண்ட பேச்சுகள் இடம்பெறுவதாகவும் கிறிஸ்டோபர் திலக் விமர்சித்தார். உதயநிதி ஸ்டாலினிடம் இருந்து கலைஞர் கருணாநிதியைப் போன்ற அரசியல் பேச்சாற்றலை எதிர்பார்த்ததாகவும், ஆனால் இரட்டை அர்த்தத்தில் பேசுவதே திமுகவின் பாரம்பரியம் என்ற பாணியில் அது உருவாகி வருவதாகவும் அவர் கூறினார். குறிப்பாக பெண்கள் மத்தியில் இதுபோன்ற பேச்சுகள் வரவேற்கத்தக்கவை அல்ல என்றும், எதிர்க்கட்சித் தலைவர் அந்த வகையில் பேசுவது ஒட்டுமொத்த அரசியலின் தரத்தையும் சட்டப்பேரவையின் மாண்பையும் பாதிக்கும் என்றும் தெரிவித்தார்.

தாராபுரம் தொகுதியில் தற்போது போட்டியிடும் வேட்பாளர்கள் அனைவரும் பெண்கள் என்று குறிப்பிட்ட அவர், பெண்களை மையப்படுத்திய அரசியல் பிரச்சாரங்களில் கண்ணியமான அணுகுமுறை இருக்க வேண்டும் என்றும் கூறினார். இளைஞர்கள் மற்றும் பெண்கள் இதுபோன்ற பேச்சுகளை விரும்பவில்லை என்றும், இது திமுகவுக்கு அரசியல் ரீதியாக சிக்கலை ஏற்படுத்தக்கூடும் என்றும் அவர் தெரிவித்தார்.

காவிரி விவகாரம் குறித்துப் பேசிய அவர், பேச்சுவார்த்தைக்குப் பிறகு தற்போது தண்ணீர் திறந்து விடப்பட்டுள்ளதாகக் குறிப்பிட்டார். காவிரி நீர் தொடர்பான நிலவரத்தைத் தொடர்ந்து கண்காணிப்பதற்காக சிறிய அளவிலான குழுவை அமைத்து தொடர்ந்து கண்காணிக்க வேண்டும் என்பதே தனது கருத்து என்றும், இதுகுறித்து காங்கிரஸ் கட்சிக்குள்ளும் பேசியுள்ளதாகவும் தெரிவித்தார். இன்னும் இரண்டு அல்லது மூன்று நாட்களில் காவிரி விவகாரம் குறித்து விரிவாகப் பேச உள்ளதாகவும் அவர் கூறினார்.

இடைத்தேர்தல் தொடர்பாக காங்கிரஸ் தலைவர்கள் தீவிரமாகப் பிரச்சாரம் மேற்கொள்வார்கள் என்றும் கிறிஸ்டோபர் திலக் தெரிவித்தார். தேர்தலுக்கு இன்னும் சில நாட்களே உள்ள நிலையில் முதல்வரும் பிரச்சாரத்தில் ஈடுபட்டு வருவதாகவும், பிரச்சாரம் தீவிரமடையும் போது கள நிலவரங்களில் மாற்றம் ஏற்படலாம் என்றும் கூறினார். ஆரம்ப கட்டத்தில் பிரச்சார ஒருங்கிணைப்பில் சிறிய அளவில் குறைபாடு இருந்ததாகவும், பின்னர் தொகுதி பொறுப்பாளர் மற்றும் அமைச்சர் ராஜேஷ்குமார் ஆகியோர் பேசி அந்தப் பிரச்சினையை சரிசெய்துவிட்டதாகவும் தெரிவித்தார்.

இடைத்தேர்தலில் பணம் வழங்கப்படுவதாகக் கூறப்படும் குற்றச்சாட்டுகள் தொடர்பாக ஆதாரம் இல்லாமல் தன்னால் கருத்து தெரிவிக்க முடியாது என்றும் கிறிஸ்டோபர் திலக் கூறினார். சிலர் பொதுமக்களிடம் பணம் கொடுத்து குறிப்பிட்ட கருத்துகளைப் பேச வைக்கக்கூடும் என்பதால், இதுபோன்ற தகவல்களை ஆதாரத்துடன் மட்டுமே அணுக வேண்டும் என்றும் அவர் தெரிவித்தார்.

தமிழ்நாட்டில் பாஜக காலூன்றுவதற்கு இடம் கொடுக்கக் கூடாது என்பதற்காகவே காங்கிரஸ் முதலில் தமிழக வெற்றிக் கழகத்துக்கு ஆதரவு அளிக்க முன்வந்ததாகவும் கிறிஸ்டோபர் திலக் தெரிவித்தார். பாஜக எங்கு அரசியல் இடம் கிடைத்தாலும் அங்கு நுழைந்து, அந்த வாய்ப்பை பெரிதாக்கி தமிழ்நாட்டில் குழப்பத்தை ஏற்படுத்தலாம் என்பதில் தீவிரமாக இருப்பதாகக் கூறிய அவர், அதனால் பாஜக தொடர்பாக தங்களுக்கு ஒரு அச்சம் இருப்பதாகவும் தெரிவித்தார்.

அதேநேரத்தில், தமிழக அரசு மத்திய அரசுடன் இணைந்து செயல்படுகிறது என்று கூற முடியாது என்றும் அவர் தெரிவித்தார். மாநில அரசுக்கும் மத்திய அரசுக்கும் இடையே ஒரு பணியுறவு இருக்க வேண்டியது அவசியம் என்றும், அந்த பணியுறவை வைத்திருப்பதை இரு அரசுகளும் அரசியல் ரீதியாக கைகோர்த்து செயல்படுவதாகக் கருதக்கூடாது என்றும் கிறிஸ்டோபர் திலக் கூறினார். தமிழகத்தின் நலனுக்காக மத்திய அரசுடன் தேவையான நிர்வாக ரீதியான தொடர்பு இருப்பது இயல்பானது என்றும் அவர் குறிப்பிட்டார்.

மேகதாது விவகாரம் தொடர்பாக கர்நாடக முதல்வர் டி.கே. சிவக்குமார் அனைத்து கட்சிக் கூட்டத்தை நடத்தி ஆலோசனை மேற்கொண்டுள்ளதை சுட்டிக்காட்டிய அவர், அதேபோல் தமிழகத்திலும் அனைத்து கட்சிகளையும் அழைத்து ஆலோசனை நடத்த வேண்டும் என்று வலியுறுத்தினார். அனைத்து கட்சிகளும் ஒன்றாக அமர்ந்து காவிரி மற்றும் மேகதாது விவகாரத்தில் தமிழ்நாட்டின் அடுத்தகட்ட நடவடிக்கை என்ன என்பது குறித்து ஒருமித்த கருத்தை உருவாக்க வேண்டும் என்றும் தெரிவித்தார்.

அனைத்துக் கட்சிக் கூட்டம் நடைபெறாத வரை ஒவ்வொரு கட்சியும் மாறி மாறி அரசியல் கருத்துகளைத் தெரிவிக்கும் சூழல் தொடரும் என்றும் கிறிஸ்டோபர் திலக் கூறினார். இதுதொடர்பாக கூட்டம் நடத்துவதற்கான முயற்சியை காங்கிரஸ் மேற்கொண்டு, திமுகவுக்கும் அழைப்பு விடுத்ததாகவும், ஆனால் திமுக அந்தக் கூட்டத்தில் கலந்து கொள்ளவில்லை என்றும் அவர் தெரிவித்தார்.

தமிழ்நாட்டின் அரசியல் சூழலில் தேசிய கட்சிகளின் செயல்பாடுகள், கூட்டணி அரசியல், தேர்தல் ஆணையத்தின் செயல்பாடுகள், காவிரி விவகாரம் உள்ளிட்ட பல்வேறு பிரச்சினைகள் தொடர்ந்து விவாதப் பொருளாக உள்ள நிலையில், மாநில நலன் சார்ந்த முக்கிய விவகாரங்களில் அனைத்துக் கட்சிகளும் ஒன்றிணைந்து ஆலோசனை நடத்த வேண்டும் என்பதே தனது நிலைப்பாடு என்றும் கிறிஸ்டோபர் திலக் தெரிவித்துள்ளார்.