வங்கி கணக்கு விவரங்களைப் பெற இனி நேரில் சென்று பாஸ்புக் அச்சிட்டு, அதிகாரியின் கையொப்பம் மற்றும் முத்திரை பெற வேண்டிய அவசியம் இருக்காது. மத்திய அரசு கொண்டுவந்துள்ள புதிய வங்கிப் பதிவேடுகள் ஆதாரச் சட்டத் திருத்தம் மூலம், வங்கிச் சேவைகள் அனைத்தும் முற்றிலும் டிஜிட்டல் முறைக்கு மாறுகின்றன.

135 ஆண்டுகள் பழமையான சட்டத்தில் மாற்றம்

1891-ஆம் ஆண்டு இயற்றப்பட்ட பழமையான 'வங்கிப் பதிவேடுகள் ஆதாரச் சட்டத்திற்கு' மாற்றாக புதிய சட்டத் திருத்தத்தை மத்திய அரசு கொண்டுவந்துள்ளது. நாடாளுமன்ற ஒப்புதலுக்குப் பிறகு, ஆகஸ்ட் 13-ல் குடியரசுத் தலைவரின் ஒப்புதலைப் பெற்ற இச்சட்டம், செப்டம்பர் 10-ஆம் தேதி அரசிதழில் வெளியிடப்பட்டது. அக்டோபர் 1 முதல் இது நாடு முழுவதும் அதிகாரப்பூர்வமாக நடைமுறைக்கு வருகிறது.

டிஜிட்டல் ஆவணங்களுக்கு முழு சட்ட அங்கீகாரம்

காகித வடிவிலான கணக்குப் புத்தகங்களுக்கு இணையாக, இன்டர்நெட் பேங்கிங் அல்லது மொபைல் செயலிகள் மூலம் பதிவிறக்கம் செய்யப்படும் பி.டி.எஃப் (PDF) அறிக்கைகள், மின்னணு கையொப்பமிட்ட (E-signature) சான்றுகள் மற்றும் கிளவுட் (Cloud) அமைப்பில் பராமரிக்கப்படும் டிஜிட்டல் பதிவுகளுக்கு சட்டப்படி முழு அங்கீகாரம் வழங்கப்பட்டுள்ளது.

தொழில்நுட்ப நடுநிலைத்தன்மை

டிஜிட்டல் தரவுகளின் உண்மைத்தன்மை, பாதுகாப்பான தரவு பரிமாற்றம் மற்றும் கணினி அமைப்பின் நம்பகத்தன்மை உறுதி செய்யப்பட்டால், அவை நீதிமன்றத்திலும் அதிகாரப்பூர்வ சான்றாக ஏற்றுக்கொள்ளப்படும்.

வாடிக்கையாளர்களுக்குக் கிடைக்கும் முக்கியப் பயன்கள்

வெளிநாட்டு விசா விண்ணப்பங்கள், கடன் கோரிக்கைகள், வர்த்தக நடவடிக்கைகளுக்கான சான்றுகள் மற்றும் பிற அரசு சேவைகளுக்கு ஆன்லைனில் பெறப்பட்ட டிஜிட்டல் கணக்கு அறிக்கைகளை நேரடியாகவே சமர்ப்பிக்கலாம்.

வங்கி அதிகாரிகளின் கையொப்பத்திற்காக மணிக்கணக்கில் காத்திருக்க வேண்டிய நிலை இனி மாறப்போகிறது.

நீதிமன்ற நடைமுறைகளில் புதிய கட்டுப்பாடு

தனிநபர்களின் சிவில் அல்லது குற்றவியல் வழக்குகளுக்காக வங்கி அதிகாரிகளை சாட்சியமாக நேரில் அழைக்கும் நடைமுறை முறைப்படுத்தப்பட்டுள்ளது. வங்கியின் கணக்கு விவரங்களில் சந்தேகம் இருப்பது போன்ற "சிறப்பு தவிர்க்க முடியாத காரணங்கள்" (Special Cause) இருந்தால் மட்டுமே நீதிமன்றம் அதற்கான காரணங்களை எழுத்துப்பூர்வமாகப் பதிவு செய்து அதிகாரிகளை நேரில் ஆஜராக கோர முடியும். இதன் மூலம் வங்கிகளின் அன்றாட வாடிக்கையாளர் சேவைகள் தடையின்றி இயங்கும்.