இந்திய ரயில்வே தனது அகலப் பாதை வலையமைப்பை முழுமையாக மின்மயமாக்கும் பணியை தீவிரமாக மேற்கொண்டு வருகிறது. இதன் ஒரு பகுதியாக, அசாம் மாநிலத்தின் ஒட்டுமொத்த 2,589 கி.மீ அகல ரயில் பாதைகளும் (Route Km) 100% வெற்றிகரமாக மின்மயமாக்கப்பட்டு சாதனை படைக்கப்பட்டுள்ளது. வடகிழக்கு எல்லைப்புற ரயில்வே மண்டலத்தின் கீழ் வரும் இந்த வரலாற்று சாதனை குறித்து தெளிவாக பார்க்கலாம்.

100% மின்மயமாக்கல் சாத்தியமானது எப்படி?

அசாமின் மிகச் சவாலான 'லம்டிங் – பதார்பூர் ஹில்' (Lumding-Badarpur Hill) பிரிவில் மின்மயமாக்கல் பணிகள் நிறைவடைந்ததன் மூலம், மாநிலம் முழுவதும் 100% மின்மயமாக்கல் இலக்கு எட்டப்பட்டுள்ளது என NFR-ன் முதன்மை மக்கள் தொடர்பு அதிகாரி கபின்ஜால் கிஷோர் சர்மா தெரிவித்துள்ளார்.

ஹப்லாங் சப்-ஸ்டேஷன் கட்டமைப்பு

ஜூன் மாதத்தில், 'ஹாஃப்லாங் கிரிட் சப்-ஸ்டேஷனை' (Haflong GSS) புதிய 'நியூ ஹாஃப்லாங் டிராக்ஷன் சப்-ஸ்டேஷனுடன்' (NHLG TSS) இணைக்கும் 132 கிலோ வாட் மின் விநியோகப் பாதை வெற்றிகரமாகச் செயல்பாட்டிற்குக் கொண்டுவரப்பட்டது.

முன்னதாக, 'ரங்கியா – முர்காங்செலெக்' (558 கி.மீ), 'சாபார்முக் – திப்ருகார்' (571 கி.மீ) மற்றும் 'பதார்பூர் – சில்சார் & பதார்பூர் – சுரைபாரி' (315 கி.மீ) ஆகிய முக்கிய வழித்தடங்களின் மின்மயமாக்கல் திட்டங்களைப் பிரதமர் நரேந்திர மோடி நாட்டிற்கு அர்ப்பணித்திருந்தார்.

பயணிகளுக்கும் ரயில்வேக்கும் கிடைக்கும் நன்மைகள்

மாநிலம் முழுவதும் மின்மயமாக்கப்பட்டு விட்டதால், இனி எல்லைகளில் டீசல் எஞ்சினில் இருந்து எலக்ட்ரிக் எஞ்சினுக்கு மாற்ற வேண்டிய அவசியம் இருக்காது. இதனால் பயண நேரம் பெருமளவு குறையும்.

சுற்றுச்சூழல் பாதுகாப்பு

டீசல் பயன்பாடு குறைக்கப்படுவதால், புதைபடிவ எரிபொருட்களை சார்ந்திருப்பது குறைந்து, சுற்றுச்சூழலுக்கு உகந்த பசுமை ரயில் போக்குவரத்து சாத்தியமாகும்.

எலக்ட்ரிக் எஞ்சின்களை இயக்குவது மற்றும் பராமரிப்பது மிகவும் எளிது என்பதால் ரயில்வே நிர்வாகத்திற்கான இயக்க செலவுகள் குறையும்.

இந்திய ரயில்வேயின் மின்மயமாக்கல் வரலாறு

இந்தியாவில் முதன்முதலாக 1925-ஆம் ஆண்டில் மும்பை விக்டோரியா டெர்மினஸ் மற்றும் குர்லா ஹார்பர் இடையே 1,500 வோல்ட் டி.சி (DC) அமைப்பில் நாட்டின் முதல் மின்சார ரயில் இயக்கப்பட்டது என்பது குறிப்பிடத்தக்கது.

தற்போது அசாமில் எட்டப்பட்டுள்ள இந்த 100% மின்மயமாக்கல் சாதனை, இந்தியாவின் வடகிழக்கு மாநிலங்களின் பொருளாதாரத்தையும் ரயில் போக்குவரத்தையும் அடுத்த கட்டத்திற்கு எடுத்துச் செல்லும் என எதிர்பார்க்கப்படுகிறது.