வங்கதேச மகளிர் கிரிக்கெட் அணியின் கேப்டன் நிகர் சுல்தானா, இந்திய அணியின் கேப்டன் ஹர்மன்ப்ரீத் கவுருடன் கைகுலுக்க மறுத்த விவகாரத்தில், வங்கதேச கிரிக்கெட் வாரியம் (BCB) தங்களது நிலைப்பாட்டை தெளிவுபடுத்தியுள்ளது. நிகர் சுல்தானாவின் முடிவு தனிப்பட்டது என்றும், அது வாரியத்தின் முடிவு அல்ல என்றும் வங்கதேச கிரிக்கெட் வாரியத்தின் மகளிர் கிரிக்கெட் கமிட்டி தலைவர் ரஃபிகுல் இஸ்லாம் பாபு தெரிவித்துள்ளார்.

கைகுலுக்க மறுத்த நிகர் சுல்தானா

மகளிர் ஆசியக் கோப்பை அரையிறுதியில் இந்தியா – வங்கதேச அணிகள் மோதின. போட்டி தொடங்குவதற்கு முன் டாஸ் நிகழ்வின்போது இரு அணிகளின் கேப்டன்களான ஹர்மன்ப்ரீத் கவுரும், நிகர் சுல்தானாவும் கைகுலுக்கவில்லை. இந்த சம்பவம் கிரிக்கெட் ரசிகர்கள் மத்தியில் பேசுபொருளானது.

இதுகுறித்து பேசிய வங்கதேச மகளிர் கிரிக்கெட் கமிட்டி தலைவர் ரஃபிகுல் இஸ்லாம் பாபு, “ஹர்மன்ப்ரீத் கவுருடன் கைகுலுக்காமல் இருப்பது நிகர் சுல்தானாவின் சொந்த முடிவு. அது வாரியத்தின் முடிவு அல்ல” என்று தெரிவித்துள்ளார். விளையாட்டு உலக நாடுகளை ஒன்றிணைக்க வேண்டும் என்பதே தங்களது நிலைப்பாடு என்றும் அவர் கூறியுள்ளார்.

ஆசியக் கோப்பையில் வங்கதேசம் வெளியேற்றம்

இந்த அரையிறுதிப் போட்டியில் முதலில் பேட்டிங் செய்த இந்திய அணி 20 ஓவர்களில் 149 ரன்கள் எடுத்தது. இலக்கை விரட்டிய வங்கதேச அணி 109 ரன்களுக்கு ஆட்டமிழந்தது. இதன்மூலம் இந்திய அணி 40 ரன்கள் வித்தியாசத்தில் வெற்றி பெற்று இறுதிப்போட்டிக்கு முன்னேறியது.

கேப்டன் பதவி நீடிக்குமா?

இதற்கிடையே நிகர் சுல்தானாவின் கேப்டன் பதவி குறித்தும் தற்போது கேள்வி எழுந்துள்ளது. அவருக்கு எதிராக ஒழுக்கம் தொடர்பான புகார்கள் வந்துள்ளதாக வங்கதேச கிரிக்கெட் வாரியம் தெரிவித்துள்ளது. இதுகுறித்து பேசிய ரஃபிகுல் இஸ்லாம் பாபு, வரும் ஆசிய விளையாட்டுப் போட்டிகளில் வங்கதேச அணியின் செயல்பாட்டை முதலில் மதிப்பீடு செய்ய உள்ளதாகவும், அதன் பின்னர் நிகர் சுல்தானாவின் கேப்டன் பதவி குறித்து முடிவு எடுக்கப்படும் என்றும் தெரிவித்துள்ளார்.

“அணியின் செயல்பாடு மற்றும் புகார்கள் குறித்து வாரியத் தலைவருடன் ஆலோசித்துள்ளோம். ஆசிய விளையாட்டுப் போட்டிகள் முடிந்த பிறகு நிலைமையை மதிப்பீடு செய்து அடுத்தகட்ட முடிவு எடுக்கப்படும்” என்றும் ரஃபிகுல் இஸ்லாம் பாபு கூறியுள்ளார்.

பெரிய அணிகளை வீழ்த்த முடியாதது பின்னடைவு

வங்கதேச மகளிர் அணியில் பல குறைபாடுகள் இருப்பதாகவும் வங்கதேச கிரிக்கெட் வாரிய நிர்வாகி ஒருவர் சுட்டிக்காட்டியுள்ளார். குறிப்பாக முன்னணி அணிகளை வீழ்த்துவதில் வங்கதேசம் தொடர்ந்து தடுமாறி வருவதாகவும், சிறிய தவறுகளால் முக்கியமான போட்டிகளில் வெற்றியை இழப்பதாகவும் அவர் குறிப்பிட்டுள்ளார். ஆசிய விளையாட்டுப் போட்டிகளுக்குப் பிறகு அணியின் செயல்பாடு, வீராங்கனைகள் மீதான புகார்கள் உள்ளிட்ட அனைத்தையும் ஆய்வு செய்து, அணியை வலுப்படுத்த தேவையான நடவடிக்கைகள் எடுக்கப்படும் என வங்கதேச கிரிக்கெட் வாரியம் தெரிவித்துள்ளது.