ஒரு சொத்தைச் சொந்தமாக்குவது என்பது வாழ்நாள் சேமிப்பைப் பொறுத்தது என்பதால், வாங்கும் சொத்தின் ஆவணங்கள் உண்மையானவையா அல்லது போலியானவையா என்பதை முழுமையாகச் சரிபார்ப்பது மிகவும் முக்கியமாகும். மூத்த வழக்கறிஞர்களின் ஆலோசனையின் அடிப்படையில் ஆவணங்களை எவ்வாறு சரிபார்க்க வேண்டும் என்பதற்கான முக்கிய வழிமுறைகள் குறித்து பார்க்கலாம்.

அசல் ஆவணங்கள் மற்றும் முத்திரைத்தாள் சரிபார்ப்பு

விற்பனையாளரிடம் உள்ள அசல் ஆவணங்களை நேரில் பார்த்து சரிபார்த்த பிறகே அதன் நகல்களைப் பெற வேண்டும். தற்போது கணினி மூலம் பதிவிறக்கம் செய்யப்படும் டிஜிட்டல் முத்திரைத்தாள்கள் புழக்கத்தில் உள்ளதால், வெறும் அச்சுப் பிரதியை மட்டும் பார்த்து ஆவணம் உண்மையானது என முடிவு செய்ய முடியாது.
சொத்து அமைந்திருக்கும் எல்லைக்குட்பட்ட தாலுகா துணைப் பதிவாளர் அலுவலகத்திற்கு நேரில் சென்று, உரிய அரசு கட்டணத்தைச் செலுத்தி, அங்குள்ள பதிவேடுகளோடு ஆவணங்களைச் சரிபார்க்க வேண்டும்.

விற்பனையாளரின் உரிமையை உறுதி செய்தல்

விற்பனைப் பத்திரத்தில் குறிப்பிடப்பட்டுள்ள பெயர், முகவரி மற்றும் புகைப்படத்தை, விற்பனையாளரின் அதிகாரப்பூர்வ அடையாளச் சான்றுகளோடு (உதாரணமாக ஆதார் அட்டை) ஒப்பிட்டுப் பார்க்க வேண்டும். துணைப் பதிவாளர் அலுவலகத்தில் உள்ள கணினிப் பதிவேட்டில் பதிவு செய்யப்பட்ட விற்பனையாளரின் புகைப்படப் பிரதியைப் பெற்று ஒப்பீடு செய்வது பாதுகாப்பானது.

நீதிமன்ற வழக்குகள் மற்றும் தடையாணைகள்

சொத்து தொடர்பான வழக்குகள் அல்லது தடையாணைகள் பற்றி ஆன்லைனிலும், முக்கியமாக தாலுகா துணைப் பதிவாளர் அலுவலகத்திலும் நேரடியாக விசாரிக்க வேண்டும். கீழ் நீதிமன்றம், உயர் நீதிமன்றம் அல்லது உச்ச நீதிமன்றத்தால் ஏதேனும் தடையாணை பிறப்பிக்கப்பட்டிருந்தால், அதுகுறித்த விவரங்கள் பதிவாளர் அலுவலகக் குறிப்பில் பதிவு செய்யப்பட்டிருக்கும்.

பிரமாணப் பத்திரம் : விற்பனையாளரிடமிருந்து, “இந்தச் சொத்தின் மீது எந்தவித சட்டச் சிக்கலோ, நீதிமன்ற வழக்குகளோ அல்லது அடமானமோ இல்லை” என்று முறைப்படியான தனிப் பிரமாணப் பத்திரத்தைப் பெற்றுக்கொள்வது நல்லது.

வங்கி கடன் மற்றும் அடமான நிலுவைகள்

ஒரு சொத்தின் மீது வங்கி மூலம் கடன் பெற்றிருந்தால், அதன் அசல் தாய் பத்திரங்கள் மற்றும் அனைத்து வரலாற்று ஆவணங்களும் சம்பந்தப்பட்ட வங்கியின் வசமே இருக்கும்.

ஆவணங்களை தர தயங்கினால் எச்சரிக்கை: விற்பனையாளர் அசல் ஆவணங்களைக் காட்டவோ அல்லது தரவோ தயங்கினால், அந்த சொத்து அடமானத்தில் இருப்பதற்கான வாய்ப்புகள் அதிகம். பதிவக ஆவணக் காப்பகத்தில் இதனை உறுதி செய்ய வேண்டும்.

ஆவணக் காப்பகத்தில் சுய சரிபார்ப்பு

தரகர் வார்த்தைகளை நம்பக் கூடாது: விற்பனையாளர் அல்லது இடைத்தரகர்களின் வார்த்தைகளை மட்டும் நம்பிச் செயல்படக் கூடாது.

இரண்டாம் பிரதி ஒப்பீடு: எந்தவொரு பத்திரம் பதிவாகும்போதும் அதன் ஒரு பிரதி மட்டுமே வாங்குபவருக்கு வழங்கப்படும்; மற்றொரு பிரதி பதிவாளர் அலுவலக ஆவணக் காப்பகத்தில் பராமரிக்கப்படும்.

காப்பக பிரதி ஆய்வு: ஆவண எண் மற்றும் உரிமையாளரின் விவரங்களைக் கொண்டு, பதிவக ஆவணக் காப்பகத்தில் உள்ள பிரதியை எடுத்து, உங்களிடம் உள்ள நகலுடன் சரியாகப் பொருந்துகிறதா என்பதை சரிபார்க்க வேண்டும்.