தமிழ்நாட்டில் பெண் தொழில்முனைவோரை உருவாக்குவதையும், அவர்களின் பொருளாதார மேம்பாட்டையும் இலக்காகக் கொண்டு “வெற்றி மகளிர் தொழில் முனைவோர் மேம்பாட்டுத் திட்டம்” செயல்படுத்தப்பட்டு வருகிறது. மாநிலம் முழுவதும் அடிமட்டத்தில் உள்ள பெண்களுக்குத் தொழில் வாய்ப்புகளை வழங்குவதே இத்தொழில் கடனுதவித் திட்டத்தின் முதன்மை நோக்கமாகும்.

பயனாளிகள் தேர்வு முறை

தொகுதிக்கு 10 பேர்: தமிழகத்தின் 234 சட்டமன்றத் தொகுதிகளிலும், தொகுதிக்கு 10 பெண் தொழில்முனைவோர்கள் வீதம் அந்தந்த தொகுதி எம்.எல்.ஏ-க்களால் தேர்வு செய்யப்படுவார்கள்.

மதிப்பீடு: சட்டமன்ற உறுப்பினர்களிடம் பெறப்படும் விண்ணப்பங்களைத் தமிழ்நாடு தொழில் முதலீட்டுக் கழகம் (TIIC) தகுதி அடிப்படையில் பரிசீலித்து கடனுதவி வழங்கும்.

திட்டத்தின் நோக்கம் & பயன்பாடு

துறைகள்: உற்பத்தி மற்றும் சேவைத் துறைகளில் புதிய தொழிற்சாலைகள் தொடங்கவும், ஏற்கனவே உள்ள நிறுவனங்களை விரிவுபடுத்த, நவீனமயமாக்க அல்லது வேறு துறைகளுக்கு மாற்றவும் நிதி வழங்கப்படுகிறது.

பயன்பாடு: நிலம் வாங்குதல், கட்டடம் கட்டுதல், உள்நாட்டு அல்லது வெளிநாட்டு புதிய இயந்திரங்கள் மற்றும் உபகரணங்கள் கொள்முதல் செய்ய இத்தொகையைப் பயன்படுத்தலாம்.

விண்ணப்பிப்பதற்கான தகுதிகள்

பங்குரிமை: நிறுவனத்தில் குறைந்தபட்சம் 51% பங்குரிமை பெண் தொழில்முனைவோரிடம் இருக்க வேண்டும்.

நிறுவன அமைப்பு: தனிநபர் நிறுவனம் (Proprietary/OPC), கூட்டாண்மை நிறுவனம் (Partnership/LLP), மற்றும் தனியாரும் பொதுத்துறை நிறுவனங்களும் (Pvt / Public Ltd) இத்திட்டத்தில் விண்ணப்பிக்கலாம்.

சிறப்புப் பயிற்சி: முதன்முறை தொழில் தொடங்கும் பெண்களுக்குத் தொழில்முனைவோர் மேம்பாடு மற்றும் புத்தாக்க நிறுவனம் (EDII) சார்பில் சிறப்புப் பயிற்சிகள் அளிக்கப்படும்.

கடன் தொகை மற்றும் நிபந்தனைகள்

கடன் அளவு: குறைந்தபட்சம் ரூ.10 லட்சம் முதல் அதிகபட்சமாக ரூ.5 கோடி (ரூ.500 லட்சம்) வரை பெறலாம்.

வட்டி விகிதம்: ஆண்டிற்கு 9.95% (முதன்மை கடன் வட்டி விகிதம்).

பயனாளி பங்களிப்பு: புதிய நிறுவனங்கள் திட்ட மதிப்பீட்டில் 20% தொகையும், இயங்கி வரும் நிறுவனங்கள் 15% தொகையும் தங்கள் பங்காகச் செலுத்த வேண்டும்.

கடன் – பங்கு விகிதம்: நிறுவனத்தின் ஒட்டுமொத்த கடன் – பங்கு விகிதம் 4 : 1 என்ற வரம்பிற்குள் இருக்க வேண்டும்.

திருப்பிச் செலுத்தும் காலம்

கடனைத் திரும்பச் செலுத்த அதிகபட்சமாக 9 ஆண்டுகள் அவகாசம் அளிக்கப்படுகிறது.

தொழில் தொடங்கும் ஆரம்பக்கட்ட சிரமங்களைக் கருத்தில் கொண்டு, இதில் 2 ஆண்டுகள் சலுகைக் காலம் (Moratorium Period) சேர்க்கப்பட்டுள்ளது. கடனை மாதாந்திரத் தவணைகளில் செலுத்த வேண்டும்.

சிபில் ஸ்கோர் மற்றும் பிணையச் சொத்து விவரங்கள்

தகுதி நிலைகள்: MSME நிறுவனங்களின் சிபில் தரவரிசை 7 அல்லது அதற்கு குறைவாகவும், தனிநபர் சிபில் ஸ்கோர் 600-க்கு மேலாகவும் இருக்க வேண்டும்.

புதிய / 3 ஆண்டுகளுக்கு உட்பட்ட நிறுவனங்கள்: கடன் தொகையில் 40% மதிப்பிலான அசையாச் சொத்தைப் பிணையமாகச் சமர்ப்பிக்க வேண்டும்.

3 ஆண்டுகளுக்கு மேல் சிறப்பாக இயங்கும் நிறுவனங்கள்: கடன் தொகையில் 20% மதிப்பிலான அசையாச் சொத்தைப் பிணையமாக அளித்தால் போதுமானது.