இந்தியக் குடும்பங்களில், குறிப்பாக வேலைக்குச் செல்லும் தம்பதிகள் மற்றும் பெரிய குடும்பங்களில் சமையலறைப் பணிகளைக் குறைக்க பாத்திரம் கழுவும் இயந்திரம் (Dishwasher) மிக முக்கியச் சாதனமாக மாறிவருகிறது. இருப்பினும், இயந்திரத்தை வாங்குவதுடன் பணி முடிவதில்லை; அதைச் சரியாகப் பராமரித்து இயக்கத் தெரிந்தால் மட்டுமே முழுப் பலனையும் பெற முடியும்.

சோப்பு மற்றும் பொருட்களின் சரியான பயன்பாடு

சாதாரண சோப்பைப் பயன்படுத்தக் கூடாது: கை முறையாகப் பாத்திரம் கழுவப் பயன்படுத்தும் லிக்விட் சோப்பை டிஷ்வாஷரில் ஊற்றக்கூடாது. இது அதிக நுரையை உருவாக்கி, தண்ணீரின் சுழற்சியைப் பாதிப்பதுடன் கதவு வழியாக வெளியேறவும் கூடும். டிஷ்வாஷருக்காகவே பிரத்யேகமாகத் தயாரிக்கப்பட்ட பவுடர், லிக்விட் அல்லது டேப்லெட்களை மட்டுமே பயன்படுத்த வேண்டும்.

அளவோடு சோப்பு பயன்பாடு: அதிக சோப்பு போட்டால் பாத்திரம் கூடுதல் சுத்தமாகும் என்பது தவறான எண்ணம். அது பாத்திரங்களில் சோப்புப் படிவங்களைத் தங்க வைத்துவிடும்.

பிரத்யேக உப்பு : இந்தியாவில் உள்ள கடின நீரில் உள்ள கால்சியம், மக்னீசியம் கனிமங்கள் பாத்திரங்களில் வெள்ளைப் புள்ளிகளையும், இயந்திரத்தில் படிவங்களையும் உருவாக்கும். இதைத் தவிர்க்க டிஷ்வாஷருக்கான பிரத்யேக உப்பைப் பயன்படுத்த வேண்டும். இதற்குப் பதிலாகச் சமையல் உப்பைப் பயன்படுத்தக் கூடாது.

ரின்ஸ் எய்ட் (Rinse Aid): இது பாத்திரங்களில் நீர்ச்சத்து தங்கிவிட்டுக் கறையாக மாறாமல், தண்ணீரைத் துளித்துளியாக வழிந்தோடச் செய்ய உதவுகிறது. குறிப்பாகக் கண்ணாடி மற்றும் ஸ்டீல் பாத்திரங்கள் பளிச்சிட இது அவசியம்.

பாத்திரங்களை அடுக்கும் சரியான முறை

இடைவெளி அவசியம்: பாத்திரங்களை ஒன்றன் மீது ஒன்றாக அடுக்கக் கூடாது. தண்ணீர் மற்றும் சோப்பு அனைத்து இடங்களுக்கும் சென்று சேரும் வகையில் கிண்ணங்கள், தட்டுகள் மற்றும் டம்ளர்களை இடைவெளியுடன் வைக்க வேண்டும்.

ஸ்ப்ரே ஆர்ம் (Spray Arm) அடைப்பு: அடுக்கப்பட்ட பெரிய பாத்திரங்கள், நடுவில் சுழலும் ‘ஸ்ப்ரே ஆர்ம்’ கரங்களின் இயக்கத்தைத் தடுக்கிறதா என்பதைச் சரிபார்க்க வேண்டும்.

கண்ணாடி மற்றும் கூர்மையான பொருட்கள்: மெலிதான கண்ணாடிப் பொருட்கள் ஒன்றோடு ஒன்று மோதி உடையாதவாறு வைக்க வேண்டும். கத்திகள் மற்றும் கூர்மையான கரண்டிகளைக் கூர் பகுதி கீழ்நோக்கி இருக்கும்படி கூடைப் பகுதியில் வைக்க வேண்டும்.

டிஷ்வாஷரில் போடக் கூடாத பாத்திரங்கள்

அனைத்துப் பாத்திரங்களையும் இயந்திரத்தில் கழுவ முடியாது. பின்வரும் பொருட்களைத் கண்டிப்பாக தவிர்க்க வேண்டும்.

மரக்கரண்டிகள் மற்றும் மரத்தட்டுகள் (வெப்பத்தால் பிளவுபடலாம்).

அலுமினியம், செம்பு, பியூட்டர் பொருட்கள்.

கைப்பிடி ஒட்டப்பட்ட மற்றும் அலங்கார வேலைப்பாடு கொண்ட பாத்திரங்கள்.

‘Dishwasher Safe’ என்று குறிப்பிடப்படாத நான்ஸ்டிக் (Non-stick) பாத்திரங்கள்.

இயக்க முறைகளும் ஆற்றல் சேமிப்பும்

உணவுக் கழிவுகளை அகற்றுதல்: பாத்திரங்களை அடுக்க உருளைக்கிழங்கு, எலும்புத் துண்டுகள், விதைகள் போன்ற பெரிய உணவுக் கழிவுகளைத் தட்டிவிட்டு வைக்க வேண்டும்.

சரியான வாஷ் சைக்கிள் (Wash Cycle): லேசான அழுக்கு உள்ள பாத்திரங்களுக்கு ‘Eco’ அல்லது ‘Quick’ மோடையும், அதிக எண்ணெய் மற்றும் காய்ந்த கறைகளுக்கு ‘Intense’ மோடையும் தேர்வு செய்யலாம். இது மின்சாரம் மற்றும் தண்ணீர் நுகர்வைக் குறைக்கும்.

அளவுக்கு அதிகமான கொள்ளளவு: ஒரே சுற்றில் அதிக பாத்திரங்களை அடுக்கினால் சுத்தம் சரியாகக் கிடைக்காது.

வழக்கமான பராமரிப்பு மற்றும் சுத்தம் செய்தல்

பில்டர் (Filter) பராமரிப்பு: அடியில் உள்ள பில்டரில் உணவுக் கழிவுகள் தேங்குவதால் துர்நாற்றம் வீசும். கையேட்டில் உள்ள வழிமுறைப்படி பில்டரை அவ்வப்போது கழற்றிச் சுத்தம் செய்ய வேண்டும்.

ரப்பர் சீல் சுத்தம்: கதவின் ரப்பர் மூடுபகுதியில் எண்ணெய் மற்றும் அழுக்கு சேர வாய்ப்புள்ளதால், ஈரத் துணியால் அதைத் துடைக்க வேண்டும்.

காற்றோட்டம்: கழுவும் சுழற்சி முடிந்ததும் கதவைச் சிறிது நேரம் திறந்து வைப்பது ஈரம் மற்றும் துர்நாற்றத்தைப் போக்க உதவும்.

ஸ்ப்ரே ஆர்ம் துளைகள்: நீர்த்தூவல் கரத்தின் சிறிய துளைகளில் அடைப்பு உள்ளதா என்பதைச் சரிபார்த்துச் சுத்தம் செய்ய வேண்டும்.

பாதுகாப்பு எச்சரிக்கைகள்

உப்பு, சோப்பு மற்றும் ரின்ஸ் எய்ட் ஆகியவற்றை அதற்கென ஒதுக்கப்பட்ட இடங்களில் மட்டுமே நிரப்ப வேண்டும்.

வீட்டில் பயன்படுத்தும் வீரியமிக்க கெமிக்கல்கள், கிருமிநாசினிகளை இயந்திரத்தினுள் ஊற்றக் கூடாது.

நீர் கசிவு, வித்தியாசமான சத்தம் அல்லது எரர் கோடு (Error code) வந்தால், வழிகாட்டியைப் பார்த்து பழுதுநீக்க வேண்டும் அல்லது அங்கீகரிக்கப்பட்ட தொழில்நிகழ் சேவை மையத்தை அணுக வேண்டும்.