நடிகரும் தமிழக முதல் அமைச்சருமான விஜய்யின் மகன் ஜேசன் சஞ்சய் இயக்குநராக அறிமுகமாகியுள்ள ‘சிக்மா’ திரைப்படத்தில் சந்தீப் கிஷன், ஃபரியா அப்துல்லா, சம்பத் ராஜ் உள்ளிட்டோர் நடித்துள்ளனர். ஆக்‌ஷன், கிரைம் மற்றும் ஹெய்ஸ்ட் பின்னணியில் உருவாகியுள்ள இந்தப் படம் 2 மணி நேரம் 26 நிமிடங்கள் ஓடுகிறது. படத்தின் மையத்தில் கடனில் சிக்கித் தவிக்கும் நூலக உரிமையாளரான குரு இருக்கிறார். பணம், போதைப்பொருள், சட்டவிரோத கேசினோ, கொள்ளை மற்றும் அதனைச் சுற்றியுள்ள திருப்பங்களே கதையை நகர்த்துகின்றன.

ஜேசன் சஞ்சயின் இயக்கம் எப்படி?

பல விமர்சனங்கள் ஜேசன் சஞ்சயின் காட்சியமைப்பு மற்றும் இயக்குநர் பார்வையை குறிப்பிட்டுள்ளன. குறிப்பாக பெரிய அளவிலான காட்சிகளை கையாள்வதில் நம்பிக்கை தெரிகிறது என்று இந்தியன் எக்ஸ்பிரஸ் குறிப்பிட்டுள்ளது. ஆனால் அந்த காட்சிகளுக்கு இணையான வலுவான திரைக்கதை அமையவில்லை என்றும் அந்த விமர்சனம் சுட்டிக்காட்டுகிறது.

சினிமா எக்ஸ்பிரஸ் விமர்சனம் படத்துக்கு 2.5/5 மதிப்பெண் வழங்கி, பல கதாபாத்திரங்கள் மற்றும் சம்பவங்கள் இருந்தாலும் அவற்றுடன் பார்வையாளர்கள் உணர்வுபூர்வமாக இணைவதற்கான ஆழம் குறைவாக இருப்பதாகக் குறிப்பிட்டுள்ளது.

சந்தீப் கிஷன், ஆக்‌ஷன், இசை

சந்தீப் கிஷனின் நடிப்பு படத்தின் குறிப்பிடத்தக்க அம்சங்களில் ஒன்றாக பல விமர்சனங்கள் கூறுகின்றன. குறிப்பாக காமெடி மற்றும் ஆக்‌ஷன் காட்சிகளில் அவரது நடிப்பு ரசிகர்களிடம் வரவேற்பைப் பெற்றுள்ளதாக ஆரம்பகட்ட சமூக வலைதள விமர்சனங்கள் தெரிவிக்கின்றன.

தமன் எஸ். இசையும் படத்தின் பலமாக சில விமர்சனங்களில் குறிப்பிடப்பட்டுள்ளது. குறிப்பாக பின்னணி இசை மற்றும் ஆக்‌ஷன் காட்சிகள் படத்தின் வேகத்துக்கு உதவுவதாக ரசிகர் விமர்சனங்களில் கூறப்பட்டுள்ளது.

முதல் பாதியில் தொய்வு?

படத்தின் கதாபாத்திரங்களை அறிமுகப்படுத்துவதற்கு கணிசமான நேரம் எடுத்துக்கொள்வதால், முதல் பாதியில் சில இடங்களில் வேகம் குறைவதாக விமர்சனங்கள் தெரிவிக்கின்றன. அதன்பிறகு படம் ஹெய்ஸ்ட்-த்ரில்லர் பாதையில் வேகம் பெறுவதாக சில பார்வையாளர்கள் கூறியுள்ளனர்.

மொத்தத்தில், ‘சிக்மா’ ஒரு பிரம்மாண்டமான ஹெய்ஸ்ட் படமாக உருவாக்க முயற்சி செய்யப்பட்டிருந்தாலும், அதன் திரைக்கதை மற்றும் கதாபாத்திர வடிவமைப்பு குறித்து விமர்சனங்கள் எழுந்துள்ளன. அதேநேரம், ஜேசன் சஞ்சயின் காட்சியமைப்பு, சந்தீப் கிஷனின் நடிப்பு, ஆக்‌ஷன் மற்றும் இசை ஆகியவை படத்தின் சாதகமான அம்சங்களாக பல ஆரம்பகட்ட விமர்சனங்களில் குறிப்பிடப்பட்டுள்ளன.