மதுரையில் அக்.15 வரை உலக தபால் தின விழிப்புணர்வு நிகழ்ச்சிகள்: பள்ளி, கல்லூரி மாணவர்களுக்கு சிறப்பு ஏற்பாடு.

மதுரை மாவட்டம் முழுவதும் உலக தபால் தினத்தை முன்னிட்டு அக்.15-ம் தேதி வரை தபால்துறை விழிப்புணர்வு நிகழ்ச்சிகள் மற்றும் சிறப்பு முகாம்கள் நடத்தப்பட்டு வருகின்றன.

ஒவ்வொரு ஆண்டும் அக்டோபர் 9-ம் தேதி உலக தபால் தினமாகக் கடைப்பிடிக்கப்பட்டு வருகிறது. இதனையொட்டி தபால்துறை சார்பில் நாடு முழுவதும் அக்டோபர் 9 முதல் 15 வரை ‘தேசிய தபால் வாரம்’ ஆகக் கொண்டாடப்பட்டு வருகிறது. இக்காலகட்டத்தில், தபால்துறையின் பல்வேறு சேவைகள் குறித்து பொதுமக்களிடையே விழிப்புணர்வு பிரசாரம் மேற்கொள்ளப்படுகிறது.

அதன்படி, அக்.9-ம் தேதி தபால்கள் தினமாகவும், 12-ம் தேதி தபால் தலைகள் சேகரிப்பு தினமாகவும், 13-ம் தேதி தபால் சேமிப்பு வங்கி, தபால் துறை ஆயுள் காப்பீடு, ஆதார் உள்ளிட்ட பொதுமக்கள் சேவை தினமாகவும், 14-ம் தேதி தபால்கள் மற்றும் பார்சல் தினமாகவும், 15-ம் தேதி தபால் தொழில்நுட்ப தினமாகவும் கொண்டாடப்படுகின்றன.

இதன் ஒரு பகுதியாக, மதுரை கோட்ட தபால் துறை சார்பில் மாவட்டம் முழுவதும் தபால்துறை தொடர்பான கண்காட்சிகள், சிறப்பு முகாம்கள், மாணவர்களுக்கான தபால்தலை சேகரிப்பு வினாடி-வினா போட்டிகள், கருத்துப்பட்டறைகள், வீதி நாடகங்கள் மற்றும் வணிகத் தபால் வாடிக்கையாளர்கள் சந்திப்பு போன்றவை நடத்தப்பட்டு வருகின்றன. மேலும், முன்னேறிய தபால் தொழில்நுட்ப வல்லுநர்களைக் கௌரவிக்கும் நிகழ்ச்சிகளும் ஏற்பாடு செய்யப்பட்டுள்ளன.

மதுரை ஸ்காட்ரோடு தலைமை தபால் நிலையம், தல்லாகுளம் தலைமை தபால் நிலையம், அரசரடி தலைமை தபால் நிலையம் மற்றும் முக்கிய தபால் நிலையங்களில் தபால் தலை விற்பனைப் பொருட்கள் பொதுமக்கள் பார்வைக்காகக் காட்சிப்படுத்தப்பட்டுள்ளன. மேலும், பள்ளி மாணவ-மாணவிகள் தபால் நிலையங்களுக்கு நேரில் வருகை தந்து, பொதுமக்களுக்கான சேவைகள் குறித்து நேரில் அறிந்து கொள்ள விரிவான ஏற்பாடுகள் செய்யப்பட்டுள்ளன.

எனவே, மதுரை மாவட்டத்தில் உள்ள பள்ளி மற்றும் கல்லூரி மாணவ, மாணவிகள் வரும் 15-ம் தேதி வரை தபால் அலுவலகங்களின் செயல்பாடுகள் குறித்துத் தெரிந்துகொள்ள விரும்பினால், சம்பந்தப்பட்ட தலைமை தபால் அலுவலரை நேரில் தொடர்பு கொள்ளலாம் எனத் தெரிவிக்கப்பட்டுள்ளது.