மகளிர் அதிகாரமளித்தலில் புதுச்சேரி அரசின் முக்கிய முன்னெடுப்புகள் – புதுடெல்லியில் நடைபெற்ற துறைசார் உச்சி மாநாட்டில் மாண்புமிகு அமைச்சர் திரு. வி.பி. சிவக்கொழுந்து உரையாற்றினார். பெண்களின் பொருளாதார சுதந்திரம், சொத்துரிமை, சமூகப் பாதுகாப்பு ஆகியவற்றை உறுதி செய்வதே உண்மையான மகளிர் அதிகாரமளித்தல் என வலியுறுத்தினார்.

புதுடெல்லியில் இன்று நடைபெற்ற மகளிர் மற்றும் குழந்தைகள் மேம்பாட்டுத் துறைசார் உச்சி மாநாட்டில், புதுச்சேரி மாநில மாண்புமிகு குடிமைப் பொருள் வழங்கல் மற்றும் நுகர்வோர் விவகாரங்கள் துறை அமைச்சர் திரு. வி.பி. சிவக்கொழுந்து அவர்கள், மகளிர் அதிகாரமளித்தலுக்காகப் புதுச்சேரி அரசு செயல்படுத்தி வரும் முக்கியத் திட்டங்கள் மற்றும் முன்னெடுப்புகள் குறித்து உரையாற்றினார்.

பெண்களுக்கு நலத்திட்டங்களை வழங்குவதுடன் மட்டும் மகளிர் அதிகாரமளித்தல் முடிவடைந்துவிடாது என்றும், பெண்கள் கல்வி பெறுதல், பொருளாதார ரீதியாகத் தன்னிறைவு அடைதல், சொத்துரிமை பெறுதல், பாதுகாப்பான சூழலில் வாழ்தல், வேலைவாய்ப்புகளைப் பெறுதல் மற்றும் தங்களது குடும்பம், சமூகம் தொடர்பான முக்கிய முடிவுகளைத் தன்னம்பிக்கையுடன் எடுக்கும் நிலையை உருவாக்குவதே உண்மையான மகளிர் அதிகாரமளித்தல் என்றும் அமைச்சர் தனது உரையில் வலியுறுத்தினார்.

குடும்பத் தலைவிகளாக உள்ள வறுமைக் கோட்டிற்குக் கீழ் வாழும் பெண்களுக்கு மாதந்தோறும் ரூ.2,500 நிதியுதவி வழங்கப்படுவதன் மூலம், குடும்பப் பொறுப்புகளை ஏற்றுள்ள பெண்களின் பொருளாதாரப் பாதுகாப்பு உறுதி செய்யப்படுவதாக அமைச்சர் தெரிவித்தார். மேலும், முதியோர் மற்றும் ஆதரவற்றோருக்கான சமூகப் பாதுகாப்புத் திட்டங்களின் கீழ், வயதுப் பிரிவுகளுக்கு ஏற்ப ரூ.2,500, ரூ.3,000 மற்றும் ரூ.4,000 மாதாந்திர ஓய்வூதியம் வழங்கப்படுவதையும் குறிப்பிட்டார்.

மகளிர் அதிகாரமளித்தல் என்பது பெண்கள் வயது வந்த பிறகு தொடங்க வேண்டியதல்ல; அது பெண் குழந்தைப் பருவத்திலேயே தொடங்க வேண்டும் என்று குறிப்பிட்ட அமைச்சர், புதுச்சேரியில் செயல்படுத்தப்படும் CM CARES திட்டத்தின் கீழ், பெண் குழந்தைகளின் எதிர்காலக் கல்வி, பாதுகாப்பு மற்றும் நிதி நிலைத்தன்மையை உறுதி செய்ய ரூ.50,000 வரை நிதியுதவி வழங்கப்படுவதை எடுத்துரைத்தார்.

பெண்களின் உண்மையான பொருளாதார அதிகாரமளித்தலுக்கு, அவர்களின் பெயரில் சொத்துக்கள் இருப்பது அவசியம் என்பதை வலியுறுத்திய அமைச்சர், பெண்கள் தங்கள் பெயரில் சொத்துக்களை வாங்குவதை ஊக்குவிக்கும் வகையில் புதுச்சேரி அரசு முத்திரைத் தீர்வையில் 50 சதவீதச் சலுகை வழங்கி வருவதைச் சுட்டிக்காட்டினார்.

பெண்களின் பெயரில் சொத்துக்கள் இருப்பது அவர்களுக்கு மட்டுமின்றி, அவர்களது குடும்பத்திற்கும் நீண்டகாலப் பொருளாதாரப் பாதுகாப்பை வழங்கும் என்றும் அவர் தெரிவித்தார்.

ஒரு பெண் பொருளாதார ரீதியாகத் தன்னிறைவு அடையும்போது குடும்பம் பாதுகாப்புப் பெறுகிறது; ஒரு பெண் சொத்து உரிமையாளராகும்போது அவரது எதிர்காலம் வலுப்பெறுகிறது; ஒரு பெண் வேலைவாய்ப்பைப் பெறும்போது நாட்டின் பொருளாதாரமும் வலுப்பெறுகிறது என்று அமைச்சர் தனது உரையில் எடுத்துரைத்தார்.

பெண்களுக்கான திட்டங்களைச் செயல்படுத்துவதுடன் மட்டும் நின்றுவிடாமல், பெண்கள் தங்களது திறமை, உழைப்பு, அறிவு மற்றும் தன்னம்பிக்கையின் மூலம் தங்களது எதிர்காலத்தைத் தாங்களே உருவாக்கிக்கொள்ளும் சூழலை உருவாக்குவதே புதுச்சேரி அரசின் நோக்கம் என்றும் அவர் தெரிவித்தார்.

புதுச்சேரியில் ஒவ்வொரு பெண்ணுக்கும் பாதுகாப்பு, சம வாய்ப்பு, பொருளாதாரச் சுதந்திரம் மற்றும் கண்ணியமான வாழ்க்கை கிடைப்பதை உறுதி செய்யப் புதுச்சேரி அரசு தொடர்ந்து செயல்படும் என மாண்புமிகு அமைச்சர் திரு. வி.பி. சிவக்கொழுந்து அவர்கள் உறுதியளித்தார்.