குடும்பத்தில் ஒரு ஆண் எந்தவித உயிலும் எழுதி வைக்காமல் எதிர்பாராதவிதமாக இறந்துவிட்டால், அவரது சுயசம்பாத்தியச் சொத்து மற்றும் பரம்பரைச் சொத்துக்கள் யாருக்குச் சேரும் என்பதில் பலருக்கும் குழப்பங்கள் நிலவுகின்றன. 1956-ஆம் ஆண்டு இந்து வாரிசுரிமைச் சட்டத்தின் (Hindu Succession Act, 1956) கீழ், வாரிசுகள் பல்வேறு பிரிவுகளாகப் பிரிக்கப்பட்டு சொத்துரிமை நிர்ணயிக்கப்படுகிறது.

முதன்மை வாரிசுகள் யார்?

சட்டப்படி, ஒரு ஆண் உயில் எழுதாமல் இறக்கும் போது, அவரது சொத்துக்களுக்கு முதல் உரிமை கொண்டவர்கள் ‘வகுப்பு 1’ வாரிசுகள் ஆவர்.

யாரெல்லாம் இதில் அடங்குவர்?

தாய்

மனைவி

மகன்கள் மற்றும் மகள்கள்

ஏற்கனவே இறந்த மகன்/மகளின் வாரிசுகள் (பேரன்/பேத்தி – சில குறிப்பிட்ட விதிகளின் கீழ்).

முக்கிய விதி: இறந்தவரின் சொத்து இந்த ‘வகுப்பு 1’ வாரிசுகளுக்குள் சம பங்காகப் பிரிக்கப்படும்.

உதாரணத்திற்கு திருமணமான ஒரு நபர் தாய், மனைவி, ஒரு மகன் மற்றும் ஒரு மகளை விட்டுவிட்டு உயிலின்றி இறந்தால், அவரது சொத்து 4 சம பங்குகளாக பிரிக்கப்பட்டு ஆளுக்கு 25% வழங்கப்படும்.

தாயின் உரிமை vs தந்தையின் உரிமை

இங்கே பலரும் செய்யும் பொதுவான தவறு, பெற்றோர்கள் இருவருக்குமே சம உரிமை உண்டு என நினைப்பதுதான். ஆனால் சட்டப்படி தாய் முதல் நிலை வாரிசு ஆவார். எனவே, மகனின் சொத்தில் மனைவி மற்றும் குழந்தைகளுக்கு இருக்கும் அதே சட்டப்பூர்வ உரிமை தாய்க்கும் உண்டு.

தந்தை இரண்டாம் நிலை வாரிசாகவே கருதப்படுகிறார். முதல் வகுப்பு வாரிசுகள் (தாய், மனைவி, குழந்தைகள்) யாராவது ஒருவர் உயிருடன் இருந்தாலும், தந்தைக்குச் சொத்தில் நேரடியாகப் பங்கு கிடைக்காது. முதல் வகுப்பு வாரிசுகள் யாருமே இல்லாத பட்சத்தில் மட்டுமே சொத்து தந்தையைச் சென்றடையும்.

திருமணமாகாத ஆண் மற்றும் திருமணமான ஆணின் சொத்து விதிகள்

திருமணமாகாத ஆண் இறந்தால் அவருக்கு மனைவியோ குழந்தைகளோ இல்லாததால், முதல் வகுப்பு வாரிசாக உள்ள தாய்க்கு மட்டுமே முழுச் சொத்தும் சென்று சேரும். தாய் உயிருடன் இல்லாத பட்சத்தில் மட்டுமே, இரண்டாம் வகுப்பு வாரிசான தந்தைக்குச் சொத்து மாற்றப்படும்.

திருமணமான ஆண் இறந்தால் மனைவி, குழந்தைகள் மற்றும் தாய் ஆகிய அனைவரும் ‘வகுப்பு 1’ வாரிசுகள் என்பதால், அனைவரும் சம பங்கை உரிமை கோரலாம். மனைவி மட்டும் முழுச் சொத்தையும் சொந்தமாக்கிக் கொள்ள முடியாது; அதேபோல தாயையும் சொத்திலிருந்து ஒதுக்கிவிட முடியாது.

சுயசம்பாத்திய சொத்து vs பரம்பரைச் சொத்து

ஒரு நபர் தனது சொந்த உழைப்பில் வாங்கிய சொத்து என்றால், அவர் உயிருடன் இருக்கும் வரை அதை யாருக்கு வேண்டுமானாலும் (உயில் மூலமாகவோ அல்லது தான செட்டில்மென்ட் மூலமாகவோ) எழுதி வைக்கும் முழு உரிமை அவருக்கு உண்டு. அதில் வாரிசுகள் உரிமை கோர முடியாது. அவர் உயில் எழுதாமல் இறந்தால் மட்டுமே மேலே குறிப்பிட்ட வாரிசுரிமைச் சட்டம் பொருந்தும்.

பரம்பரைச் சொத்து: நான்கு தலைமுறைகளாகப் பிரிக்கப்படாமல் வரும் பரம்பரைச் சொத்தில், ஒரு குழந்தை பிறந்தது முதலே அதற்குப் பிறப்புரிமை வந்துவிடுகிறது.

பெண்கள் இறந்தால் சொத்து உரிமை யாருக்கு?

ஒரு பெண் உயில் எழுதாமல் இறந்தால், பிரிவு 15-ன் படி அவரது சொத்து முதலில் அவரது குழந்தைகள் மற்றும் கணவருக்குச் சமமாகப் பிரியும். குழந்தைகள் மற்றும் கணவர் இல்லாத பட்சத்தில், அச்சொத்து கணவரின் வாரிசுகளுக்குச் செல்லும். அதன்பின்னரே அப்பெண்ணின் தாய் மற்றும் தந்தைக்குச் செல்லும். அப்பெண் தனது பெற்றோரிடமிருந்து பெற்ற சொத்தாக இருந்தால், குழந்தைகள் இல்லாத பட்சத்தில் அது மீண்டும் தந்தையின் வாரிசுகளுக்கே திரும்பச் செல்லும்.

நீதிமன்ற தகராறுகளைத் தவிர்க்க எளிய வழி

குடும்பத்தில் தேவையற்ற மனக்கசப்புகள் மற்றும் நீண்டகால நீதிமன்ற வழக்கைத் தவிர்க்க, ஒவ்வொரு நபரும் தங்கள் சுயசம்பாத்திய சொத்துக்களை சட்டப்பூர்வமாக உயில் (Will) எழுதிப் பதிவு செய்து வைப்பதே பாதுகாப்பானதாகும். இத்தகவல் இந்து வாரிசுரிமைச் சட்டத்தின் பொதுவான விழிப்புணர்வுக்காக வழங்கப்பட்டது. இஸ்லாமிய மற்றும் கிறிஸ்துவச் சட்டங்கள் மாறுபடலாம். பிரத்யேகச் சொத்துச் சிக்கல்களுக்குச் சட்ட வல்லுநர்களை அணுகுவது சிறந்த வழி ஆகும்.