தமிழ் மொழியின் கலைச் சுடரைப் போற்றி வளர்ப்பதில், தமிழக அரசின் கீழ் இயங்கும் தமிழ்நாடு இயல், இசை, நாடக மன்றம் மிக முக்கியமான பங்களிப்பை வழங்கி வருகிறது. தமிழ் வளர்ச்சித் துறையின் நேரடி மேற்பார்வையில் செயல்பட்டு வரும் இந்த அமைப்பிற்கு, தவெக ஆட்சி அமைந்ததைத் தொடர்ந்து பிரபல நாட்டுப்புறக் கலைஞர் புஷ்பவனம் குப்புசாமி புதிய தலைவராக நியமிக்கப்பட்டுள்ளார். கலை உலகில் தனக்கெனத் தனி முத்திரை பதித்த ஒருவருக்கு இந்த உயர் பொறுப்பு வழங்கப்பட்டிருப்பது, கலைக் குடும்பத்தினர் மற்றும் பொதுமக்களிடையே பெரும் மகிழ்ச்சியை ஏற்படுத்தியுள்ளதுடன், அவருக்குப் பல்வேறு தரப்பிலிருந்தும் பாராட்டு மழையைக் குவித்து வருகிறது.

தமிழ் நாட்டுப்புற இசைத் துறையில் த தவிர்க்க முடியாத ஆளுமையாக விளங்கும் புஷ்பவனம் குப்புசாமி, எண்ணற்ற பக்திப் பாடல்களையும், மக்களின் மனங்களைக் கவர்ந்த நாட்டுப்புறப் பாடல்களையும் பாடி புகழ்பெற்றவர். திரையுலகிலும் தனது கம்பீரக் குரலால் தடம் பதித்துள்ள இவர், ‘ஆளான நாள் முதலா’ (காதல் கவிதை), ‘தொட்டுத் தொட்டுப் பேசும் சுல்தானா’ (எதிரும் புதிரும்), ‘குருவி கொடஞ்ச கொய்யாப்பழம்’ (அழகி), ‘பொட்டு எடுத்து வச்சுவிடவா’ (ஸ்டைல்), ‘காதலுக்கு பள்ளிக்கூடம்’ (பேரழகன்), ‘அப்பன் பண்ணா’ (திருப்பாச்சி), ‘காத்தாடி போல’ (மாயாவி), ‘ஜிங் சிக்கா’ (வீரம்) மற்றும் ‘எத்தனை சாமி’ (இட்லி கடை) உள்ளிட்ட பல வெற்றிப் பாடல்களைப் பாடி ரசிகர்களின் இதயங்களில் நீங்கா இடம் பிடித்துள்ளார்.

தமிழ் திரையுலகின் முன்னணி இசையமைப்பாளர்களான இளையராஜா, வித்யாசாகர், பரணி, தேவி ஸ்ரீ பிரசாத், யுவன் சங்கர் ராஜா, டி.இமான், பரத்வாஜ், ஜி.வி. பிரகாஷ் மற்றும் அனிருத் ஆகியோரின் இசையில் பாடிய பெருமைக்குரியவர். பாடுவதோடு மட்டுமன்றி, ‘சொல்ல மறந்த கதை’ மற்றும் ‘வேல்முருகன் போர்வெல்ஸ்’ ஆகிய திரைப்படங்களில் குணச்சித்திரக் கதாபாத்திரங்களில் நடித்து தனது நடிப்புத் திறனையும் வெளிப்படுத்தியுள்ளார்.

இசைப் பயணத்தோடு சேர்த்துத் தனது கல்வியிலும் சிறந்து விளங்கிய புஷ்பவனம் குப்புசாமி, கிராமியப் பாடல்கள் குறித்த தீவிர ஆய்வை மேற்கொண்டு முனைவர் (Ph.D.) பட்டம் பெற்றுள்ளார். இவரைப் போலவே இவரது மனைவி அனிதா குப்புசாமியும் இசையில் முதுகலை (M.A.), ஆய்வியல் நிறைஞர் (M.Phil.) மற்றும் முனைவர் பட்டங்களைப் பெற்ற திறமைமிகு நாட்டுப்புறப் பாடகி ஆவார். இந்த இணையர் இந்தியாவிலும், உலகின் பல்வேறு நாடுகளிலும் இதுவரை சுமார் 3,000-க்கும் மேற்பட்ட இசை நிகழ்ச்சிகளை நடத்தித் தமிழ் நாட்டுப்புறக் கலையை உலகரங்கிற்கு எடுத்துச் சென்றுள்ளனர். மேலும், பல முன்னணித் தொலைக்காட்சி இசைப் போட்டிகளில் நடுவராகவும் பணியாற்றி, வளர்ந்து வரும் இளம் கலைஞர்களுக்கு வழிகாட்டியாகத் திகழ்கின்றனர்.

நாட்டுப்புறக் கலையின் மேன்மையையும், அதன் பாரம்பரியத்தையும் நன்கு உணர்ந்த ஒரு கலைஞர் இயல், இசை, நாடக மன்றத்தின் தலைவராகப் பொறுப்பேற்றிருப்பது, தமிழகக் கலைத் துறைக்கு மேலும் புதிய பரிமாணத்தையும், நவீன எழுச்சியையும் தரும் என்று எதிர்பார்க்கப்படுகிறது.