தலை முதல் கால் வரை உடல் முழுவதும் சோப்பு போட்டு தேய்த்துக் குளித்தால்தான் சருமம் முழுமையாகச் சுத்தமாகும் என்று பலரும் நினைக்கின்றனர். ஆனால், தினமும் உடலின் அனைத்து பகுதிகளிலும் சோப்பு பயன்படுத்த வேண்டிய அவசியம் இல்லை என்கிறார்கள் தோல் மருத்துவர்கள். அதிகமாக அல்லது கடுமையான சோப்புகளைத் தொடர்ந்து பயன்படுத்துவது சருமத்தில் உள்ள இயற்கையான எண்ணெய்களை அகற்றி, வறட்சி மற்றும் எரிச்சலை ஏற்படுத்தக்கூடும்.

இதுகுறித்து SPARSH மருத்துவமனையின் தோல் மருத்துவர் டாக்டர் அம்பிகா குமார் கூறுகையில், ஒவ்வொருவரின் சருமமும் தனித்துவமானது. உடல் உழைப்பு, வியர்வை, காலநிலை மற்றும் அன்றாடச் செயல்பாடுகளுக்கு ஏற்ப குளிக்கும் முறையும் மாறுபடும் என்றார்.

அக்குள், பாதங்கள், தொடை இடுக்குகள் போன்ற பகுதிகளில் வியர்வை, ஈரப்பதம் மற்றும் துர்நாற்றம் அதிகமாக சேர வாய்ப்புள்ளதால், இந்தப் பகுதிகளை தினமும் மிதமான கிளென்சர் கொண்டு சுத்தம் செய்யலாம். குறிப்பாக கால்களை கழுவிய பிறகு விரல்களுக்கு இடையில் ஈரப்பதம் தேங்காமல் நன்றாக உலர்த்துவதும் அவசியம். பிற உடல் பகுதிகளுக்கு தினமும் சோப்பு பயன்படுத்த வேண்டிய கட்டாயம் இல்லை; தண்ணீரால் மென்மையாகக் கழுவுவது பலருக்கு போதுமானதாக இருக்கலாம்.

பிறப்புறுப்புப் பகுதியில் கடுமையான சோப்புகள், அதிக வாசனை கொண்ட கிளென்சர்களைப் பயன்படுத்துவதையும், அதிகமாகத் தேய்ப்பதையும் தவிர்க்க வேண்டும். சென்சிட்டிவ் அல்லது வறண்ட சருமம் உள்ளவர்கள் fragrance போன்ற அதிக வாசனைப் பொருட்கள் இல்லாத மிதமான கிளென்சர்களைத் தேர்வு செய்யலாம். Glycerin போன்ற ஈரப்பதத்தைத் தக்கவைக்க உதவும் பொருட்கள் கொண்ட தயாரிப்புகளையும் பயன்படுத்தலாம்.

மேலும், “Natural”, “Herbal” என்று குறிப்பிடப்பட்டுள்ள சோப்புகள் அனைவருக்கும் பாதுகாப்பானவை என்று கருதக்கூடாது. அவற்றில் உள்ள சில பொருட்களும் அலர்ஜி அல்லது எரிச்சலை ஏற்படுத்தலாம். மிகவும் சூடான தண்ணீரில் நீண்ட நேரம் குளிப்பதைத் தவிர்த்து, வெதுவெதுப்பான தண்ணீரில் குறுகிய நேரம் குளிப்பது நல்லது. குளித்த பிறகு சருமம் சிறிது ஈரமாக இருக்கும்போதே மாய்ஸ்சரைசர் பயன்படுத்துவது ஈரப்பதத்தைப் பாதுகாக்க உதவும்.

சருமத்தில் தொடர்ந்து வறட்சி, அரிப்பு, சிவத்தல் அல்லது எரிச்சல் இருந்தால், சுயமாக சோப்புகளை மாற்றாமல் தோல் மருத்துவரை அணுகுவது நல்லது.